भांगरभूंय | प्रतिनिधी
रांची टॅस्ट सुरू जावचे पयलीं इंग्लंडाचो मुखेली बेन स्टोक्स अंपायर्स कॉलाचे तरतुदीचेर समाधानी नाशिल्लो. पूण, काल शेनवारा अंपायर्स कॉलान इंग्लंडा वटेन म्हत्वाची भुमिका वठयली. भारताचे तीन बॅट्समन (शुभमन गिल, रजत पाटीदार आनी रविचंद्रन अश्विन) अंपायर्स कॉलाचे शिकार थारले.
दुसऱ्या दिसाच्या खेळांत भारता वतीन तीन खेळगड्यांनी म्हत्वाची भुमिका वठयली. यशस्वी जयस्वालाच्या अर्द शेंकड्या उपरांत ध्रुव जुरेल आनी कुलदीप यादव हांचे मदीं 42 धांवड्यांची नाबाद भागिदारी जाली. पूण, भारत अजून इंग्लंडा परस 134 धांवड्यांनी फाटीं आसा.
अंपायर्स कॉल सोडल्यार भारताच्या बॅट्समनां कडेन शोएब बशीराचे स्पीन बॉलिंगेक लेगीत जाप नाशिल्ली. शोएभ बशीर एकेक करून भारताच्या बॅट्सनाक तंबूत धाडटालो. ताका लागून जेवणाच्या विसवा उपरांत मुखेली स्टोक्सान एके वटेन बशीरा कडल्यान सेगीत 31 ओव्हरी करून घेतल्यो. बशीरान जयस्वाल, गिल, पाटीदार आनी रवींद्र जडेजा हांकां बाद केले. पूण, भारताची विकेट घेवपाची सुरवात अणभवी फास्ट बॉलर जेम्स अॅण्डरसनान रोहीत शर्माक तंबूंत धाडून केली. जे मेरेन इंग्लंड बॅटींग करतालो, तो मेरेन कडक वत आशिल्लें. पूण, जसो बॉल अॅण्डरसनाच्या हातांत आयलो हवामानान कूस बदल्ली. अॅण्डरसनाक सीम मुव्हमॅण्ट मेळटाली.
रोहीताची विकेट बेगीन पडली खरी. पूण, फाटले मॅचींत भारताक जैत मेळोवन दिवपाक म्हत्वाचें योगदान दिवपी गिल आनी जयस्वाल हांणी डाव मुखार व्हेलो. दोगांयनी मेळून भारताचो स्कोर 100च्या लागसार व्हेलो. अखेरेक गील बाद जाल्ल्यान ही भागिदारी फुटली. 38 धांवड्यो करून तंबूंत परतलो. गिल आनी पाटीदार हांच्या रुपान भारताक सेगीत दोन धपके अंपायर्स कॉलाच्या रुपान बसले. फाटले मॅचींत भारताक संकश्टांतल्यान भायर काडपी जडेजाक हे खेपे खास प्रदर्शन करपाक जमलें ना.
जयस्वालान मात एक बाजू सांबाळून धरिल्ली. सरफराज खाना वांगडा मेळून भारताचो डाव सांबाळपाचो ताणें यत्न केलो. जयस्वालान माळेंत चवथे खेपे 50 परस चड धांवड्यो केल्यो. पूण, लॅंथीचेर पडपी बशीराचो बॉल तो बॅकफुटाचेर खेळपाक गेलो. पूण, बॉल सकयल उरिल्ल्यान बोल्ड जालो.
इंग्लंडाच्या बॅट्समनां कडेन तुळा केली जाल्यार भारताच्या बॅट्समनांनी चड चुकी केल्यो. पूण, पयल्या दिसा परस दुसऱ्या दिसा खेळपट्टीन आपलो रंग बदलिल्लो. खेळपट्टी वयल्यो वेरो वाडिल्ल्यो आनी जयस्वाल ज्या बॉलाचेर बोल्ड जालो. तो बॉल वेर केल्ले सुवातेर पडल्या उपरांत सकयल उरलो.
खेळपट्टी, परिस्थिती आनी प्रदर्शन हांचे खेरीत भारताच्या फावरादांत गेली ती म्हणल्यार इंग्लंडान दिल्लीं जीवनदानां. सुरवातीक जयस्वालाची कॅच विकेटकिपरा पसून मात्शीं आयल्यान पडिल्ली. पूण, अंपयारान ही कॅच आसा काय ना हें निश्चीत करपा खातीर तिसऱ्या अंपायराक विचारलें. तिसऱ्या अंपायरान जयस्वालाक नाबाद दिलो. सरफराजाक एक न्हय दोन-दोन जीवनदानां मेळ्ळीं. पूण, दोनूय जीवनदानांचो ताका फायदो घेवपाक जमलो ना.
भारताचो डाव सुरू जावचे पयलीं इंग्लंडान 7 बाद 302 धांवड्यां वयल्यान मुखार खेळपाक सुरवात केल्ली. रुट आनी ऑली रॉबिनसन खेळपट्टीचेर आशिल्ले. भारतान पयल्याच नवो बॉल घेवंक नाशिल्लो. काल सिराजान पोरण्या बॉलान सुरवात केली. पूण, दोन बॉल घाल्या उपरांत रोहीत शर्मान नवो बॉल घेतलो. पूण, इंग्लंडाच्यो बाकी आशिल्ल्यो तिनूय विकेटी जडेजानूच घेतल्यो. रुटान पयल्या दिसा शेंकडो पुर्ण केल्लो. पूण, पयल्या दिसा भशेन दुसऱ्या दिसा लेगीत तो नाबाद तंबूंत परतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
