भांगरभूंय | प्रतिनिधी
खबरां संस्था
एडिलेडः पांच टॅस्ट मॅचीचे हॉकी माळेतलें दुसरे मॅचींत ऑस्टेलियेन भारताक 7 आड 4 गोलांनी हारयलें. भारताचो कॅप्टन हरमनप्रीत सिंगान खेळाच्या तिसऱ्या मिनटाक गोल करून पंगडाक आघाडी मेळोवन दिल्ली. मात ऑस्ट्रेलियेच्या ब्लेक गोवर्सान 12 व्या मिनटाक गोल करून पंगडाक बरोबोरी करून दिली. ताणे हे मॅचींत हॅट्रिक केली.
17 व्या मिनचाक जेक वेल्चान ऑस्ट्रेलियेक आघाडीचेर व्हेलें. 24 व्या मिनटाक ताणे आपलो दुसरो गोल करून 3-1 अशी आघाडी घेतली. 25 व्या मिनटाक हार्दिक सिंगान गोल करून स्कोर 3-2 केलो. तीन मिनटांत 3 गोल करून ऑस्ट्रेलियेन खेळाचेर आपलें वर्चस्व दवोरलें. 4-2 असो स्कोर आसतना भारता खातीर रहील मोहम्मदान तिसरो गोल केलो. मात ऑस्ट्रेलियेच्या जेकब अंडरनस 48व्या आनी जेक व्हेटान 49 मिनटाक तशेंच गोवर्सान 53व्या मिनटाक गोल करून ऑस्ट्रेलियेच्या जैताचेर म्होल लायली. हरमनप्रीत सिंगान निमाणच्या मिनटाक आपलो दुसरो गोल केलो मात ताणे कांय फरक पडलो ना.
ऑस्ट्रेलियेन पयली मॅच 5-4 गोलांनी जिखिल्ली. माळेंतली तिसरी मॅच 30 नोव्हेंबराक चवथी 3 डिसेंबराक आनी पांचवी 4 डिसेंबराक जातली. ऑस्ट्रेलियेच्या एडी ऑकेंडान दुसरे मॅचींत खेळून आपल्या आंतरराष्ट्रीय कारकिर्दींतल्यो 400 मॅची पुराय केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
