भांगरभूंय | प्रतिनिधी
येजमान ऑस्ट्रेलिया आनी पाकिस्तान ह्या पंगडां मदीं मॅलबॉर्न क्रिकेट मैदानाचेर टॅस्ट माळेंतली दुसरी मॅच चालू आसा. दुसऱ्या दिसाचो खेळ सोंप मेरेन पाकिस्तानान पयल्या डावांत 6 विकेटी वगडावन 194 धांवड्यो केल्यात. मोहम्मद रिजवान 29 आनी आमिर जमाल 2 धांवड्यो करून खेळपट्टीचेर आसा.
ऑस्ट्रेलिया पंगडान आपल्या पयल्या डावांत 318 धांवड्यो केल्यो. अशे तरेन पाकिस्तान अजून 124 धांवड्यांनी फाटीं आसा. पाकिस्तान एका वेळार बरे स्थितींत आशिल्लो. ताणें एक विकेट वगडावन 124 धांवड्यो केल्ल्यो. ते उपरांत 70 धांवड्यो करतना आनीक पांच विकेटी वगडायल्यो.
पाकिस्तानाची सुरवात बरी जाली ना. इमाम उल हक 10 धांवड्यो करून बाद जालो. नॅथन लायनाच्या बॉलाचेर मार्नस लाबुशेनान ताची कॅच धरली. ते उपरांत अब्दुल्ला शफीकान मुखेली मसुदा वांगडा मेळून दुसरे विकेटी खातीर 90 धांवड्यांची भागिदारी केली. टॅस्ट कारकिर्दींतलो ताचो हो पांचवो अर्द शेंकडो थारलो.
ही भागिदारी कमिन्सान फोडली. ताणें स्वताच्या बॉलाचेर शफिकाची कॅच धरली. शफिकान 109 बॉलांनी पांच चवक्यांचे मजतीन 62 धांवड्यो केल्यो. उपरांत कमिन्सान बाबर आजमाक बोल्ड केलो. बाबरान फकत एके धांवडेचें योगदान दिलें. मसुदान हे मजगतीं आपलो आठवो अर्द शेंकडो पुर्ण केलो. तो 76 बॉलांनी 54 धांवड्यो करून बाद जालो. हातूंत तीन चवक्यांचो आनी एका सक्याचो आस्पाव आशिल्लो.
सौद शकील णव धांवड्यो करून जोश हेजलवुडाचो शिकार थारलो.जाल्यार आगा सलमान पांच धांवड्यो करून तंबूंत परतलो. रिजवान आनी जमाल हांच्या कडल्यान व्हड खेळीची आस्त आशिल्ली.
ऑस्ट्रेलिये वतीन मुखेली कमिन्सान तीन विकेटी घेतल्यो. लायनान दोन जाल्यार हेजलवुडान एक विकेट मेळयली.
ते पयलीं ऑस्ट्रेलियेन दुसऱ्या दिसा आपलो डाव 3 बाद 187 धांवड्यां वयल्यान मुखार व्हरपाक सुरवात केली आनी उरिल्ल्या सात विकेटींनी 131 धांवड्यांची भर घाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
