भांगरभूंय | प्रतिनिधी
भारत आनी येजमान दक्षीण आफ्रिका ह्या पंगडां मदीं फाल्यांच्यान माळेंतले दुसरे आनी निमाणे टॅस्टीक सुरवात जातली. पयली टॅस्ट व्हडा फरकान हारल्या उपरांत भारताक आतां केट टावनांत आव्हानांक तोंड दिवचें पडटलें. दक्षीण आफ्रिकेचो आदलो फास्ट बॉलर अॅलन डॉनाल्डाच्या म्हणण्या प्रमाणें, दक्षीण आफ्रिके आडचे पयले टॅस्टींत बॉलरांक अनुकूल आशिल्ले खेळपट्टीचेर भारताच्या फास्ट बॉलरांक बरी कामगिरी करपाक जमूंक नाशिल्ली. आतां न्युलॅण्ड्सांत बॅट्समनांक अनुकूल खेळपट्टीचेर चड संयमान बॉलींग करपाची गरज आसा. थंय स्पिनरांची भुमिका चड आसची ना. सेंच्युरियनाचे खेळपट्टीचेर भारताक पयले टॅस्टींत एक डाव आनी 32 धांवड्यांनी हार घेवची पडिल्ली. हे खेळपट्टीचेर बावन्स आनी बरीच ‘लॅटरल मुव्हमॅण्ट’ आशिल्ली.
दक्षीण आफ्रिकेन परिस्थिती अदीक बरे तरेन समजून घेतली, हातूंत मातूय दुबाव ना. तांणी बॉल पांच वा 5.5 मिटर मेरेन पीच केलो आनी खेळपट्टीक ताचें काम करपाक दिलें. पूण, तांणी भारता परस एक गजाल बरी केली. हे गजालींत ते चड संयमी आशिल्ले आनी तांणी दुसऱ्या डावांत शॉर्ट बॉलांचो मात्सो चडूच उपेग केलो अशें डॉनाल्डान मुखार म्हणलें.
72 टॅस्टींनी खेळटना 330 विकेटी घेवपी डॉनाल्डान मुखार म्हणलें, भारताच्या बॉलरांनी खूब बेगीन शॉर्ट बॉल घालपाक सुरवात केली आनी उपरांत तांणी तांची लॅन्थ वगडायली. ताचो दक्षीण आफ्रिकेच्या बॅट्समनांनी फायदो घेतलो. केप टापनांत ही स्थिती खूब कठीण आसतली. दोनूय पंगडांनी खूब जोश आसतलो. दोनूय पंगडांची आक्रमणांची चांचणी केप टावनांत जातली.
केप टावनाची खेळपट्टी ही सेंच्युरियनांतले खेळपट्टी वेगळी कशी आसतली. ह्या प्रस्नाक जाप दितना डॉनाल्डान म्हणलें. केप टापनांत बॉलरांक चड क्रिएटिव्ह जावचे पडटले. हाचें मुखेल कारण म्हणल्यार थंयची विकेट सपाट आसा. ताका लागून बॅट्समन सहज व्हड भागिदारी करपाक शकतात आनी ताका लागून टॅस्ट खूब कठीण जातली. नवी बॉलाचेर चडांतचड भर दिवपाक शकता. परंपरीक रितीन जर दक्षीण-पश्चिम वारो न्युलॅण्ड्सांत व्हांवता. ताका लागून खेळपट्टी सुकी जाता. हे खेळपट्टीचेर स्पिनरांक टर्न मेळटलो अशें आपल्याक दिसतना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
