भांगरभूंय | प्रतिनिधी
खबरां संस्था
तिरुवनंतपूरमः पयले टी-20त हार खावची पडिल्ल्यान दुसरे मॅचींत भारताक हारोवन पांच मॅचींचे हे माळेत बरोबोरी करपाचे आवेशान खेळपी ऑस्ट्रेलियेच्या नशिबांत तातूंतय निमणे हार बरयल्ली. तांका निमाणे 44 धांवड्यानी हार खावची पडली. हे प्रमाण सूर्यकुमार यादवाच्या युवा भारतीय पंगडान पांच मॅचीचें हे माळेंत 2-0 अशी आघाडी घेतली. विशाखापट्टनमात जाल्ले पयले वन-डेंत भारतान 2 विकेटींनी जैत जोडल्लें. तिरुवनंतपुरमाक हीच कामगिरी फुडें सुरू दवोरून भारताचो स्पीनर रवी बिष्णोय हामे मॅथू शॉर्ट (19) आनी जोस इंल्गेश (2) हांका आवट करून उपरांत अक्षर पटेलान मॅक्सवेलाक (12) कॅच आवट करून पंगडाक दुसरें जैत मेळोवन दिवपाचे दिकेन पावलां घातली. 7 ओव्हरींत ऑस्ट्रेलियेच्या नांवार ह्या वेळार 4 आवट 57 धांवड्यो लागल्ल्यो आनी भारताचे बॉलार नेटांत आशिल्ले.
पूण टीम डेव्हीड आनी मार्कस स्टॉयनीस हांचेर पंगडाचो हार- जिखपाचो निर्णय घेवपाची जापसालदारी येवंन पडली. 10 ओव्हरींत तांणी पंगडाचो (104)शेकडो पुराय केलो. ही निर्णायक जोडी फोडपा खातीर भारताचो कॅप्टन सूर्यकुमारान मुकेस कुमाराक लेगीत बॉलींग दिली. पूण जिखपाचें वा मरपाचें ह्या निर्धारन खेळपी हे जोडयेन भारतीय बॉलरांक वरचड जावपाक दिलें ना. 12 वे ओव्हरींत हे जोडयेन 131 धांवड्यो बोर्डार लायल्यो तेन्ना ऑस्ट्रेलियन पंगडाच्या जैताची सुलूस लागपाक सुरवात जाली. निमणे रवी बिष्णायान डेव्हीडाक कॅच आवट करून भारताच्या जैताची आस्त तयार केली. डेव्हिडान 22 बॉलांत 4 चौके आनी 2 सक्यांनी 37 धांवड्यो केल्यो. मात भारताच्या बॉलरांनी सेगीत विकेटी घेतल्यो.
कॅप्टन मॅथ्यू वेडाचेर पंगडाची लज राखपाची जापसालदारी येवंन पडली. पूण मुकेश कुमारान आपली कमाल दाखोवन स्टॉयनीसाक अक्षर पटेला वरवीं कॅच आवट केलें आनी भारताच्या जैताच्या मार्गातलो व्हडलो आडसर कुशीक केलो. ताणे 25 बॉलांत 2 चौके आनी 4 सक्यांनी 45 धांवड्यो केल्यो. प्रसिद्ध कृष्णान 16 ओव्हरींत सीम अॅबोट आनी नाथान एलिस हांका आवट करून भारताक जैताच्या लागीं हाडलें. 154 धांवड्यांत 8 विकेटी पडल्यान ऑस्ट्रेलियेक कोण वाटायतलो व्हो प्रश्न आशिल्लो. अॅडम झम्पाक अर्शदीपान बोल्ड केलो तेन्ना भारताच्या जैताचो सोपस्कार तितलो बाकी आशिल्लो. मॅ चाथ्यू वेडान निमाण्या ओव्हरींत फटकेबाजी करून 4 सक्यांनी नाबाद 42 धांवड्यो केल्यो मात पंगडाक मात जो जैतिवंत करपाक शकलो ना. प्रसिद्ध कृष्णा आनी रवी बिष्णाय हांणी दरेकी 3 विकेटी घेवन भारतात जैतिवंत केलेें.
भारताचें 236 धांवड्यांचें आव्हान
यशस्वी जयस्वाल, ऋतुराज गायकवाड आनी इनाश किशन हांचे स्पोटक बॅटिंगेक लागून दुसऱे टी-20 मॅचींत भारतान ऑस्ट्रेलियेक 236 धांवड्यो करून मॅच जिखपाचे आव्हान दिलें. ऑस्ट्रेलियेचो कॅप्टन मॅथ्यू वेडान टॉस जिखून भारताक पयलीं खेळपाक सांगलें. ताचो व्हो निर्णय ताका म्हारग पडटलो हे भारताच्या बिन्नीच्या बॅट्समनांनी दाखोवन दिलें. यशस्वी जयस्वाल आनी ऋतुराज गायवाड हाणी 77 धांवड्यांची सलामी दिली. जयस्वालन 9 चौके आनी 2 सक्यांनी 25 धांवड्यांत तुफानी (53) अर्द शेंकडो करून पॅव्हेलियनांत आयलो. गायकवाडाक इशान किशन मेळ्ळो आनी तांणी भारताक देड शेकडो (164) करून दिलो. इशान किशनान 32 बॉलांत 3 चौके आनी 6 सके हुबोवन 52 धांवड्यो करून ऑस्ट्रेलियन बॉलरांक घाम काडलो. ओव्हर सोपतात म्हकणून कॅप्टन सूर्यकुमारान (दोन सक्यांनी 19) पयले टी-20 प्रमाण फटकेबाजी सुरू केली पूण तातूंत तो आवट जालो. पंगडाच्या 189 धांवड्याचेर नाथान इलिसाच्या बॉलाचेर स्टॉयनीसान ताची कॅच घेतली. रिंकू सिंगान प्रेक्षकांची अपेक्षा पुराय करतना 9 बॉलांत 4 चौके आनी 2 सक्यांनी नाबाद 31 धांवड्यो केल्यो.20 ओव्हरींत भारताच्या नांवार 235 धांवड्यो लागल्यो. ऑस्ट्रेलिये वतीन नाथन इलिसान 3 विकेटी घेतल्यो. एक विकेट स्टॉयनीसाक मेळ्ळी.
पयले टी-20त हार खावची पडल्यान ऑस्ट्रेलियन पंगडांत दोन बदल केल्ले. अॅडम झम्पा तांणी पंगडांत घेतलो. मात ताचो व्हडलोसो परिणाम भारताचेर जाल्लो दिसलो ना. निमाणे कांय ओव्हरीत कॅप्टन मॅथ्यू वेडान आक्रमण केलें मात भारताचे सेगीत दुसरे टी-20तलें जैत कांय तो आडावपाक शकलो ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
