भांगरभूंय | प्रतिनिधी
दुसरें इनाम श्री गावडेश्वर हौशी नाट्यमंडळ आनी तिसरें श्री राष्ट्रोळी कला वैभवाक मेळ्ळें
हरमल: हरमलच्या दुर्वांकुर कला केंद्रान आयोजीत केल्ल्या तिसर्या हरमल गांव मर्यादीत नाट्य सर्तींत कोरकण वाडो श्री राष्ट्रोळी ब्राह्मण कला निकेतन नाट्यमंडळाक पयलें इनाम फावो जालें. हे संस्थेन पावनखिंडीचें रणझुंझार नाटक सादर केल्लें. हे सर्तीचें मार्च महिन्यांत उक्तावण जाल्लें. 1 मे दिसा नाट्य सर्तींतलें निमाणें नाटक सादर केलें. हे सर्तींत 10 नाट्यसंस्थांनी वांटो घेतलो.
अंदूंची सर्त हरमल जिल्हो पंचायत वांगडे रंगनाथ कलशांवकार आनी एक नाट्य मोगी (हरमल) हांणी पुरस्कृत केल्ली.
हे सर्तीचें दुसरें इनाम श्री गावडेश्वर हौशी नाट्यमंडळाच्या (याजसाठी केला होता अट्टाहास) आनी तिसरें श्री राष्ट्रोळी कला वैभवच्या (सरनोबत) नाटकाक फावो जालें. तशेंच उमेद वाडोवपी इनाम सकयलोवाडो नाट्यमंडळ (धनुर्भग), श्री गणेश नाट्यमंडळ (अमरदान) आनी श्री रवळनाथ प्रासादीक नाट्यमंडळाच्या (गोंधळात गोंधळ) नाटकांक फावो जालीं.
उत्कृश्ठ अभिनया खातीर पयलें इनाम सागर कोरकणकार, दुसरें दिनेश कोचरेंकार आनी तिसरें अरुण गावडे हाका मेळ्ळें. बायलांच्या गटांत थळावी कलाकार दिपाली राजन गावडे हाका इनाम दिलें. जाल्यार किरण नायक, दत्ताराम हळदणकार, साईश नायक, साईदास नायक, काशिनाथ पै, वैभव पै, साईश कोरकणकार, सानवी ठाकूर आनी अनुष्का ठाकूर हांकां खासा प्रमाणपत्रां भेटयलीं.
हे सर्तीच्या इनामां भेटवण सुवाळ्याक मुखेल सोयरे म्हणून सरपंच बेर्नाड फेर्नांडीस, जाल्यार खासा आमंत्रीत पंच सुशांत गावडे, परीक्षक सत्यवान पालयेंकार, ज्ञानेश्वर पालयेंकार, दिलीप गोसावी आनी संस्थेचे अध्यक्ष चंद्रहास दाभोलकार हाजीर आशिल्ले.
हे संस्थेन गांवांतल्या युवा कलाकारांक उर्बा दिवपा खातीर हे सर्तीचें आयोजन केल्लें. ह्या उपक्रमांतल्यान संस्थेच्या कामाची व्याप्ती वाडटली. तशेंच कलाकारांची तांक सिद्ध करपा खातीर आत्मविश्वास वाडटलो, अशें संस्थेचे अध्यक्ष चंद्रहास दाभोलकार हांणी सांगलें.
परीक्षक ज्ञानेश्वर पालयेंकार हांणी हरमल गांवांतल्या युवा आनी नव्या कलाकारांक बी संद उपलब्ध आशिल्ल्यान नाट्यकलेंत रमून एक उत्कृश्ठ कलाकार म्हणून नांव जोडचें असो उलो मारलो आनी तांणी दुर्वांकूर संस्थेक तांणी परबीं भेटयलीं.
ह्या वेळार संस्थे वतीन मानेस्तांक यादस्तीक भेटयलें. सुरवातेक दुर्वांकूर संस्थेचे रामचंद्र केरकार, आत्माराम कोरकणकार, गोवींद परब, सज्जन नायक, प्रदीप नायक, विजय बर्डे हांणी मानेस्तांक फुलांचोप तुरो भेटोवन येवकार दिलो. सुत्रनिवेदन आनी उपकार संजय मयेंकार हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
