भांगरभूंय | प्रतिनिधी
फोंडें: दुर्गीणी- धारबांदोड्यां राष्ट्रीय म्हामार्गार गाडी आनी दोन चाकी मदीं अपघात जालो. दोनूय वाहनांनी एकामेकांक मुखारच्यान धपको दिलो. हातूंत दोन चाकीचेर आशिल्ले दोग भाव जखमी जाले. मकसूद खान आनी झाफर सादिक (चिंबल) अशीं त्या दोगाय जखमी भावांचीं नांवां. लागींच ड्युटीचेर आशिल्ल्या फोंडें येरादारी पुलिसांनी जखमींक १०८ ऍम्बुलन्सींतल्यान हॉस्पिटलांत व्हेले. सध्या त्या दोगांयचेर गोमेकाँत उपचार चलतात.
मेळिल्ले म्हायती प्रमाण कर्नाटकांत शिक्षण घेवपी झाफर सादिक हाका पावोवपा खातीर ताचो भाव मकसूद खान हो जीए- ०७-व्ही -१९६९ नंबराची दोन चाकी घेवन मोल्यां वटेन वतालो. दुर्गीणी हांगच्या धोंड बार्रा मुखार राष्ट्रीय म्हामार्गार विरुद्ध दिकेन येवपी जीए -०८-एम-११७७ नंबराचे गाडयेचो धपको दोन चाकीक बसलो. हातूंत दोन चाकीवेले दोगूय जाण रस्त्यार कोसळून जखमी जाले.
ह्या अपघाताची म्हायती मेळटांच सुमार २०० मिटर अंतराचेर ड्युटीवर आशिल्ले फोंडें येरादारी पुलीस खात्याचे सहाय्यक उपनिरीक्षक लक्ष्मीकांत नायक आनी हेर कर्मचार्यांनी जखमींक हॉस्पिटलांत व्हरपाक मजत केली. अपघाता वेळार मोटार चालकाक न्हिद आयिल्ल्याचो अदमास उक्तायला. कुळें पुलिसांनी येवन अपघाताचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
