भांगरभूंय | प्रतिनिधी
पणजीः 1 ऑगस्ट सावन कला अकादमीचे दिनानाथ मंगेशकार सभाघर दुरुस्ती खातीर बंद आसतलें. हें काम केन्ना पुराय जातलें हें तज्ञ वांगड्यांनी सादर केल्ल्या निमाण्या अहवालाचेर निंबून आसा. हे खातीर आयआयटी चेन्नयचे डॉ. पिल्लय हांची तज्ञ म्हूण नेमणूक केल्या, अशी म्हायती कला अकादमीचे वांगडी सचीव शंकर गांवकार हांणी सांगलें.
कला अकादमीच्या दुरुस्तीकामा विशीं टास्क फोर्सान केल्ल्या कामांचे तपशील सादर करतना गांवकार हांणी सांगलें, टास्क फोर्सान आवाज रोशणाय आनी ध्वनीशास्त्र आनी संरचनात्मक थिरता हे दोन वेगळे विशय घेवन तांचे खातीर वेगळे तज्ञ नेमल्यात.
आवाज रोशणाय आनी ध्वनीशास्त्र खातीर तीन तज्ञ टास्क फोर्सान नियुक्त केल्यात. तांणी पयली मुळावो अहवाल तयार केल्लो, पूण निमाणो अहवाल तयार करपा खातीर तांणी फाटी पळोवणी लेगीत केल्या. आतां ह्या निमाण्या अहवालांत खंयच्यो चुकी सारक्यो करच्यो हें सांगून ते प्रमाण त्रुटी सुदारतले, अशें गांवकार हांणी सांगलें.
संरचानत्मक थिरता आनी त्रुटी सुदारपाची पद्दती ह्या विशायांत टास्क फोर्सान आयआयटी चेन्नयचे डॉ. पिल्लय हांची नियुक्ती केल्या. पयलीं जें काम जालां तें सारकें आसा काय ना हें तज्ञूच सारकें सांगपाक शकतात. कितें चुकलां आनी कितें सुदारपाक जाय हें तज्ञ आपल्या निमाण्या अहवालांत मांडून भौशीक बांदकाम खात्याक हीं कामां ताकतिकेन करपाक सांगतले. अदमाशेक खर्च तयार करून 1 ऑगस्टा सावन काम चालू करतले, अशी म्हायती गांवकार हांणी दिली.
कला अकादमीचे दुरुस्ती खातीर 50 कोटीं रुपयांचो अदमास खर्च तयार केल्लो. तातूंतले 10 कोटी आमी आडावन दवरल्यात आनी हें काम उरिल्ल्या 10 कोटींतल्यान जातलें. जे मेरेन हे विशींचो अहवाल तयार जायना, ते मेरेन हे पयशे मंजूर जावचे नात, अशें गांवकार हांणी स्पश्ट केलें.
फक्त कला अकादमीचे दिनानाथ मंगेशकार सभाघरूच बंद आसतलें, पुराय कला अकादमी न्हय. ब्लॅक बॉक्स, हेर वर्ग आनी कार्यालायां चालू आसतलीं. 1 ऑगस्टा उपरांत बुकींग करपाक मेळचें ना. हें सभाघर कितले दीस बंद आसतले असो प्रस्न टास्क फोर्साक विचारिल्लो. पूण ते म्हणटात, हे तज्ञ पंगडाच्या निमाण्या अहवालाचेर निंबून आसा. जर ते सगळे कितें सारकें आसा म्हणटा जाल्यार कांयच काम जावचें ना. बारीक कितें काम आसल्यार म्हयन्या भितर काम जावं येता, अशी म्हायती गांवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
