भांगरभूंय | प्रतिनिधी
अनील गुणपत्रे खून प्रकरण
म्हापशें: हांगासरल्या टॅक्सी स्टॅण्डा कुशीक शुल्लक बाचाबाची वेल्यान जिवघेणो हल्ल्यांत मरण आयिल्लो अनील गुणपत्रे (56, खोर्ली म्हापशें) हांच्या खून प्रकरणांतलो दुबावीत आरोपी हिमांशू पटवाल (33, बरासवरी, झारखंड) हाची म्हापशेंच्या अतिरिक्त जिल्हो आनी सत्र न्यायालयान सशर्त जामिनार सुटका केली.
25 हजार रुपया हमी रक्कम आनी तितल्याच रकमेच्या दोन हमिदारांची हमी. तशेंच दरेक सुनावणे वेळार दुबावीत न्यायालयांत हजर रावतलो हाची खात्री दिवपी वचनपत्र कुटुंबां कडल्यान वा इश्टां कडल्यान दिवप, बांबोळे मानसोपचार आनी मानवी वर्तन संस्थेंत नेमान उपचार घेवप, आनी सुनावणे वेळार सदर ओपडी प्रत न्यायालयांत सादर करप, न्यायालयाच्या परवानगी बगर देशा भायर वच्चें न्हय. साक्ष पुराव्यांत फेरफार वा हांयस दाखोवपाचो यत्न करचो न्हय, अश्यो अटी न्यायालयान हो जामीन अर्ज मंजूर करतना घाल्यात.
मजगतीं, ही हल्ल्याची घडणूक बिरेस्तारा 16 नोव्हेंबर 2023 दिसा सांजवेळा 7.15 वरांच्या सुमाराक म्हापशें टॅक्सी स्टॅण्डा कुशीक घडिल्ली. दुबावीत आरोपीन शुल्लक कारणा वलल्यान जखमी गुणपत्रे हांचे कडेन वाद घालो आनी तांकां रस्त्यारूच खर मारपेट केल्ली.
जखमीक जिल्हो हॉस्पिटलांतल्यान फुडल्या उपचारा खातीर गोमॅकाँत दाखल केल्लो. जाल्यार दुबाविताचें मानसीक संतुलन सारकें नाशिल्ल्यान ताका बांबोळे मनोरुग्णालयांत दाखल केल्लो. दुबाविताक 18 नोव्हेबर दिसा मनोरुग्णांतल्यान डिस्चार्ज मेळ्ळे उपरांत पुलिसांनी ताका भादंसंच्या 307 कलमा खाला जिवघेणो हल्ल्याच्या आरोपा खाला गुन्यांव नोंद करून अटक केल्ली. पूण जखमी अनील रामा गुणपत्रे हांकां 21 नोव्हेंबर दिसा उपचारा वेळार मरण आयलें. उपरांत पुलिसांनी हो गुन्यांव भादंसंच्या 302 कलमा खाला खुन्याच्या आरोपांत वर्ग केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
