भांगरभूंय | प्रतिनिधी
म्हापशें: पुस्तकाचीं पानां पिंजिल्ल्याच्या कारणा वेल्यान यत्ता चौथींत शिकपी णव वर्सा पिरायेच्या विद्यार्थ्याक मारपेट केल्ल्या प्रकरणांत कोलवाळ पुलिसांनी अटक केल्ल्या दुबावीत दोगांय शिक्षकांची बाल न्यायालयान सशर्त जामिनार सुटका केली.
न्यायालयान दुबावीत आरोपी सुजल गावडे (रा. वेरें, बार्देस) आनी कनिशा गडेकार (रा. पिर्णा, बार्देस) ह्या दोगांय निलंबीत शिक्षकांक दरेकी 25 हजार रुपया हमी रक्कम आनी तितल्याच रकमेच्या हमिदाराचे हमीचेर हो जामीन मंजूर केलो. तशेंच तपास अधिकार्यांक गरज त्या वेळार चवकशी खातीर पुलीस स्टेशनार हजर रावप, तपासकामांत सहकार्य करपा सयत हेर आवश्यक अटी लागू केल्यात.
मजगतीं, ही घडणूक फाटल्या 2 सप्टेंबर दिसा सकाळीं 8.30 वरांचेर वागळी-कामुर्ली हांगासरले एके मुळावे शाळेंत घडिल्ली. ह्या प्रकरणांत पिडीत विद्यार्थ्याच्या बापायन कोलवाळ पुलिशेंत कागाळ दाखल केले उपरांत 3 वेर दुबावीत शिक्षकां आड भारतीय न्याय संहितेच्या कलम 118(1), 126(2), 351(2) आनी 3(5) तशेंच गोंय बाल कलम 8 खाला गुन्यांव नोंद केलो.
पिडीत विद्यार्थ्यान पुस्तकाचीं दोन पानां पिंजिल्ल्याची तिडक आयिल्ल्यान तिडकल्ल्या दुबावीत शिक्षकांनी स्टिलाचे पट्टेन पिडीत विद्यार्थ्याक मारपेट केल्ली. ताचेर फोंपार मारून ताचो चेरो फळ्यार ओडिल्लो. तशेंच ताच्या तिसरेंत शिकपी बापोल आतेभावाक धमकी दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
