भांगरभूंय | प्रतिनिधी
पिळर्ण रेहबर खान खून प्रकरण
म्हापशें: पिळर्णा रेहबर खान खुर्शीद अली खान (22, मूळ उत्तर प्रदेश) हाच्या खून प्रकरणांतलो मुखेल दुबावीत आरोपी विकास यादव (22, रा. कांदोळी) हाका पर्वरी पुलिसांनी अटक केली. दुबावीत आरोपी फाटले चार दीस फरारी आशिल्लो. आतां मेरेन ह्या प्रकरणांत स जाणांक अटक जाल्या.
हो खुनाचो प्रकार मंगळारा 16 एप्रील दिसा उत्तर रातीं घडिल्लो. पिळर्ण पर्वरे ऑडीट भवना कुशीक मयत रेहबराची कूड पुलिसांक रस्त्यार सांपडिल्ली. मयताक मरण मान मोडिल्ल्यान तशेंच फाटीच्या कण्याक खर मार बशिल्ल्यान आनी रक्तस्राव जाल्ल्यान जाल्ल्याचें मरणा उपरांतच्या तपासणी अहवालांतल्यान स्पश्ट जालां.
पुलिसांनी चवकशी वेळार मोगिणी कडेन छळ चलयिल्ल्याचे तिडकींतल्यान मोगी विकास यादव हाणें आपल्या 12 ते 15 वांगड्यांच्या आदारान खून केल्ल्याचें निश्पन्न जाल्लें.
ते प्रमाण पुलिसांनी बुधवारा 17 वेर दुबावीत आरोपी खतेश कांदोळकार, सुमन बरीक, सचीन सहानी, तनय कांदोळकार आनी सचीन सिंग (सगले रा. कांदोळी) ह्या दुबावितांक धरून अटक केल्ली. सद्या ते पुलीस कोठींत आसात.
जाल्यार हेरां सयत दुबावीत आरोपी विकास यादव हो फरार आशिल्लो. पुलिसांनी शुक्रारा दनपारां दुबाविताक ताब्यांत घेवन ताका अटक केली.
मजगतीं, मयत रेहबर हो ताच्या सलुना शेजरा आशिल्ल्या मिनी सुपरमार्केटाचे धनणी कडेन एकतर्फी मोग करतालो आनी तातूंतल्यान तिचे कडेन लागसारपण सादपा सयत नग्न फोटो मॉर्फ करून तो तिचे कडेन सोशल मिडियाचेर व्हायरल करपाची धमकी दिवन तिचो छळ करतालो.
हे तरणाटे कडेन दुबावीत आरोपी विकास यादव हाचें मोगाचें प्रकरण सुरू आशिल्लें. हो छळणुकीचो प्रकार ते तरणाटेन विकासाच्या कानार घालो. पूण धमकी दिवन लेगीत मयत आयकत नाशिल्लो. दुबावीत विकास हाच्या सांगण्या वेल्यान ते तरणाटेन मयताक रातचो मेळपाक आपयलो.
सोमारा 15 वेर रातच्या 10 वरांच्या सुमाराक मयत ते तरणाटेन सांगिल्ले सुवातेर मेळपाक आयलो. त्या वेळार दुबावीत आरोपी थंय आयलो आनी ताणें मयताचें अपहरण केलें आनी ताका गाडयेंतूच मारपेट केली. उपरांत घडणूक थळार ताका रस्त्यार उडोवन फोंपरांनी आनी दांड्यान मारपेट केली आनी जखमी अवस्थेंत ताका थंयच उडोवन तांणी धांव मारली. घडणुकेची सुवत निर्जनथळ आशिल्ल्यान ताका कसलोच वैजकी उपचार मेळ्ळो ना. ताका लागून रक्तस्राव जावन थंयच ताका मरण आयिल्लें.
ह्या प्रकरणाचो फुडलो तपास पुलीस निरिक्षक जितेंद्र नायक वरिश्ठांच्या मार्गदर्शना खाला करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
