भांगरभूंय | प्रतिनिधी
हालींच एक फुगेट गोंयांत फुटली. तिचो आवाज अजून थांबना. ठो ठो जायत आसा. आतां ही फुगेट गोंयांत हाडून फोडपा फाटलें कारण कळना. पंचायत वेंचणुको ते चवथ मेरेन फुगेटी फुटट्ल्योच त्या आवाजांत हो आवाज कोणाच्या कानार पडचोना, अशें बी दिसलें काय कोणाक? काय गोंयांत कितेंय केल्यार पचता असो बी कोणाचोय समज जाला काय? एक गजाल खरी ती म्हणल्यार आतां गोंय पयलींचें उरूंक ना. शांत आनी सुशेगाद गोंयांक कोणाची तरी नदर लागल्या आनी गोंयांत नाका आशिल्लें घडूंक लागलां. ह्यो फुगेटी गोंयच्यो न्ही. तरी फुट्टात गोंयांत आनी बाबडें गोंय आनी गोंयकार बदनाम जातात. सगळ्यांत चड बदनाम जातात ते गोंयचे पुलीस. तांचेर कोणूच विश्वास दाखयनात. भायले दाखयनात तें एकवेळ समजूं येता पूण आमचेय लोक तांकां पातयेनात.
आनी पातयेवप तरी कशे काय? जेन्ना एकाद्या खुनाक काळजाचो आताक म्हणून सांगून केस बंद करूंक पळेतात तेन्ना तांचेर विश्वास तरी कसो दवरपाचो? आतां हें सोनाली फोगाट प्रकरण घेयात. तिका गोंयांत आयिल्ले कडेन मरण आयलें. पुलिसांनी रोखडेंच काळजाचो आताक म्हणून सांगून प्रकरण सोपयलें. तांचें आयकून मुख्यमंत्र्यानूय तेंच सांगलें. आतां कोणें कोणाचें आयकलें हें तेच सांगूक शकतले. सोनालीचो भाव रिंकू ढाका गोंयात आयलो आनी सोनाली प्रकरणाक वेगळेंच मोडण मेळ्ळें. हें काळजाचो आताक येवन आयिल्लें मरण न्ही तर हो खून म्हणपाचें त्याच पुलिसांनी सांगलें. कांय जाणांक धरले. उपरांत तिका ड्रग्स दिल्ले
म्हणपाचेंय मुखार आयलें. जंय ड्रग्स पिवयल्ले त्या होटॅलाच्यो व्हिडियो फुटेजीस लोकांक पळोवंक मेळ्ळ्यो. आनी चवकशी जावचे पयलींच होटॅल जमनी भरवण केलें. कित्याक पुरावे ना करूंक? हो प्रश्न पडले बगर कसो रावत. उपरांत प्रकरण सिबीआय कडेन पावलें.
आनी आतां सोनालीच्या भावान ह्या प्रकरणाक एक वेगळें मोडण दिवचेलो येत्न केला. कांय दिसां पयलींच ताणें खाप महापंचायती मुखार आपले भयणीक कुलदीप बिश्नोईन मारल्या म्हणपाचो आरोप केला. इतले दीस तो तिच्या पिए कडेन बोट दाखयतालो. फाटलीं कांय वर्सां तो तिका पिडटालो म्हणपाचें सांगतालो. ताणेंच तिका मारल्या म्हणपाचेंय ताणें पुलिसेक सांगिल्लें. आनी ताच्याच सांगण्या वयल्यान पुलिसांनी सगळी कारवाय केल्ली. पूण आतां ताणें आपणालो रोख बदल्ला. ताचें बोट कुलदीप बिश्नोई वटेन वळ्ळां. आनी खाप महापंचायतीन ताचें आयकून बिश्नोईक महापंचायती मुखार येवन आपणालें म्हणणें मांडूक सांगलां. रिंकू ढाकान बिश्नोईक आरोपी करतनाच गोंय पुलिसांकूय दोश दिला. ताणीं तपास दुसरेच कडेन व्हेला आनी पुरावे ना केल्यात म्हणपाचो आरोप ताणें केला. आतां गोंय पुलीस ताका कितें जाप दिता ती पळोवंक जाय.
सोनालीक मरण आयलें तेन्ना रिंकू ढाकान सुरवेक सांगलें तिका जेवणांत कितेंतरी घालून मारल्या. ताका सुरवाती पसून तिचो पिए सांगवानचो दुबाव आसलो. तो फाटलीं तीन वर्सां तिका पिडटालो, तिचें शोशण करतालो म्हणपाचें ताणें सांगलें. आतां प्रश्न येता, एक मनीस एके बायल मनशेचें शोशण करता तरी ती ताचे वांगडा वेगळ्या वाठारांनी भोवंक वता. ताका आपणालो पिए म्हणून दवरता. वेगळो फ्लॅट घेवन ताचे वांगडा रावता, आपणाले सगळे वेव्हार ताचे कडल्यान करून घेता हें कशें. तातूंत ती बायल कितें दुबळी नासली. राजकारणांत आशिल्ली बायल अशी शोशण करून घेता आनी तें सोसता? तशें आसल्यार सामान्य लोकांचें कितें जावपाचें तर? आनी तिचो भाव जो आज बोवाळ घालता तोय फाटलीं तीन वर्सां वोग्गी रावन सगळें पळेता? ताणें पयलींच भयणीक साथ कित्याक दिलिना? हें प्रकरण तिका मरण येवचे पयलींच पुलिसेंत कित्याक दिलें ना? तिका सांगवाना वांगडा गोंयांत येवपा पासून कित्याक आडायली ना? गरजूच आशिल्ली जाल्यार तो भयणी वांगडा वा तिच्या फाटोफाट गोंयांत कित्याक आयलो ना? ती मरपाची वाट कित्याक पळोवची पडली ताका?
बरें, फाटलीं तीन वर्सां जो तिका पिडटालो, तातूंत बिश्नोईचो हात आसलो अशें काय अजून रिंकून म्हणूंक ना. घडये फाल्यां म्हणत वा आनीक एकादें दुसरेंच नांव वयर येत. पूण हांतल्यान जाता कितें तर गोंय पुलिसांचेर दोश येता. जर रिंकू ढाकान बोवाळ करूंक नासलो, जाल्यार हो खून म्हणपाचें कळचेंच नासलें. थंयच्या राजकारण्यांनी मागणी करूंक नासली जाल्यार ही केस सिबीआय कडेन वचची नासली. हाचो अर्थ पुलीस कितेंतरी लिपयताली वा खंयतरी उणी पडिल्ली. गोंयांत आनीकूय अश्यो गजाली घडल्यात. एकली घरा कडल्यान कामाक वचूंक भायर सरली पूण भलतेच कडेन पावली आनी दुसरे दिसा तिचें मडें दर्यांत मेळ्ळें. पुलीस ती आत्महत्या म्हूण सांगून मेकळे. घरचीं म्हणटात तिचो खून जाला. पूण तांचे हात रिंकू वरी वयर वयर पावूंक ना. म्हणटकूच ती केस पोल जाता.
हालींच मांडवी पुलार एक अपघात जालो आनी स्कुटर चलोवपी मांडवींत पडलो. घरचीं म्हणटात तो पडूंक ना तर ताका मारून उडयला. तो बरो पेवंक जाणा आसलो. पडल्यार पेवून
वयर सरपाचो. बरें तो उसळून पडलो जाल्यार गाडयेची स्पीड कितली आसली? पुलाचेर बंधनां आसात काय ना? आनी वयल्या दोनूय केसिंनी तांच्या आंगा वयले कपडे गायब जाल्यात. कपडे नुस्त्यांनी बी खाले म्हणपाचे? हाची चवकशी जावंक जाय न्ही. नासल्यार लोक बोट दाखयतलेच.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
