भांगरभूंय | प्रतिनिधी
मरण आयिल्ल्यां मदीं तीन खाशा भाव
उदकाचो आनी झोताचो येवंक ना अदमास
पांच जाण पर्यटना खातीर गेल्ले न्हंयेचेर
भांगरभूंय । प्रतिनिधी
फोंडें : मेटावाडो- कुळेंच्या दुदसादर न्हंयेंत न्हावपाक देंविल्ल्या वास्को वाठारांतल्या 4 जाणांक उदकांत बुडून मरण आयलें. ही दुर्घटणा शेनवारा सकाळीं घडली. मरण आयिल्ल्यां मदीं चिखली- मुरगांवच्या 3 खाशा भावांचो आस्पाव आसा. मरण आयिल्ले सगळे तरणाटे 19 ते 25 वर्सां पिराय गटांतले आसात. तातूंत रामन पारसू मदेर (19. रा. आदर्श नगर, चिखली मुरगांव), लक्ष्मण पारसू मदेर (19. रा. आदर्श नगर चिखली, मुरगांव), हिरण्णा पारसू मदेर (रा. आदर्श नगर चिखली, मुरगांव) आनी विजय साजिली (रा. न्यू वाडो, गणेश देवळा लागसार, वास्को- वसंत जोशी कॉलेज, झुआरीनगराचो विद्यार्थी) हांचो आस्पाव आसा. कुळें पुलिसांनी कुडी भायर काडले उपरांत घडणुकेचो पंचनामो केलो.
पुलिसांनी दिल्ले म्हायती प्रमाण वास्को आनी चिखली वाठारांतले 5 तरणाटे कुळेंचे न्हंयेचेर पर्यटना खातीर गेल्ले. शेनवारा सकाळीं वास्को ते कुळें मेरेन रेल्वेंतल्यान प्रवास केलो. कुळें रेल्वे स्टेशनाचेर देंवले उपरांत चलत न्हंयेचेर गेले. न्हंयेच्या उदकांत न्हांवपाचो आनंद घेतना उदकाचो आनी झोताचो अदमास येवंक नाशिल्ल्यान चार जाण न्हंयेंत बुडपाक लागले. आपले सांगाती बुडटात हें पळोवन एका तरणाट्यान न्हंयेदेगेर वचून उदकांत बडी उडयली. पूण बडी वल्हान आशिल्ल्यान 4 जाणां कडेन पावपाक शकली ना. ताका लागून आबूज जाल्ले स्थितींत त्या तरणाट्यान 100 मिटर अंतराचेर आशिल्ल्या मुख्य रस्त्याचेर वचून मजती खातीर बोवाळ मारलो. त्या वेळार एके दुचाकी वयल्यान बसून तो तरणाटो कुळें पुलीस स्टेशनाचेर गेलो. पुलिसांक म्हायती दिले उपरांत तत्काळ कर्मचारी वर्ग घडणुकेचे सुवातेर पावलो.
थळाव्या लोकांचे मजतीन पुलिसांनी 4 तरणाट्यांच्यो कुडी उदका भायर काडल्यो. पुलीस निरिक्षक राघोबा कामत आनी हेर पुलीस कर्मचाऱ्यांनी घडणुकेचो पंचनामो केलो. ते उपरांत सगल्यो कुडी पोस्टमार्टमा खातीर मडगांवच्या हॉस्पिटलांत व्हेल्यो.
लोकांनी न्हावपाक न्हंयेंत देंवचें न्हय : सरपंच
शेनवारा सकाळीं खूब दुर्दैवी घडणक कुळें वाठारांत घडली. पयलेच खेपे एकाच वेलार 4 तरणाट्यांक बुडून येवपाची घडणूक घडल्या. दुदसादर न्हंयेचेर येवपी लोकांक उदकाचो अदमास येनाशिल्ल्यान बुडपाच्यो घडणुको घडटात. हे खातीर लोकांनी न्हावपा खातीर न्हंयेंत देंवचें न्हय. ते खातीर थळावे पंचायती वतीन विवीध सुवातांचेर धोको दाखोवपी तकटे लायल्यात, अशें सरपंच गोविंद शिगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
