भांगरभूंय | प्रतिनिधी
पणजी : राज्यांत दुचाकींच्या अपघातांचें प्रमाण वाडत आसलें तरी दुचाकी नोंदणीचो आंकडो देंवला. 2022 चे तुळेन 2023 वर्सा दुचाकींची नोंदणी उणी जाल्या. 2022 वर्सा भाड्याच्या मोटारसायकलींची नोंदणी 5089 जाल्ली. 2023 वर्सा ही नोंदणी 3110 जाल्या.
खासगी मोटारसायकल तशेंच दुचाकींची नोंदणी लेगीत उणी जाल्या. 2022 वर्सा 46465 खासगी दुचाकींची नोंदणी जाल्ली. 2023 वर्सा हो आंकडो उणो जावन 34326 दुचाकींची नोंदणी जाल्या. कोविडा वेळार सगल्या वाहनांची नोंदणी उणी जाल्ली. कोरोना उपरांत मात दुचाकी सयत हेर गाडयांची नोंदणी वाडपाक लागली. 2021 परस 2022 वर्सा भाड्याच्या तशेंच खासगी मोटारसायकलींचे नोंदणेंत वाड जाल्ली. 2023 वर्सा मात ती देंवल्या.
2019 वर्सा भाड्याच्या 2553 दुचाकींची नोंद जाल्ली. हाचे उपरांत 2020 वर्सा 758 जाल्यार 2021 वर्सा 1823 दुचाकींची नोंद जाल्ली. खासगी दुचाकींचो विचार केलो जाल्यार 2019 वर्सा 44463 दुचाकींची नोंद जाल्ली. 2020 वर्सा 29617, जाल्यार 2021 वर्सा 32725 दुचाकींची नोंद जाल्ली.
2020 वर्सा कोरोनाक लागून लॉकडावन आशिल्लो. लॉकडावनाच्या काळांत दुचाकींची नोंदणी देंवली. उपरांत ती वाडपाक लागली. मात 2022 चे तुळेन 2023 वर्सा परतून दुचाकींची नोंदणी देंवल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
