भांगरभूंय | प्रतिनिधी
कामगार संघटनेची मागणी
पणजी : पीडब्ल्यूडी कामगार पुरवण सोसायटीन कांय दिसां आदीं ४५० पदां भरपा विशीं जायरात दिल्ली. मात तीं दिसवड्याच्या कोंतार भरतले. अशें करप गोंयकार तरणाट्यांची फकांडां थारतलीं. हीं सगलीं पदां कायम स्वरुपी पद्दतीन भरचीं वा भरती प्रक्रिया पुरायेन रद्द करची, अशी मागणी कामगार फुडारी अॅड. अजय प्रभुगांवकार हांणी केली. शुक्रारा तांणी भरती प्रक्रिया रद्द करपा विशीं खात्यांतल्या अधिकार्यांक निवेदन दिलें. ह्या वेळार तांचे संघटणेंतले हेर पदाधिकारी हाजीर आशिल्ले.
अॅड. प्रभूगांवकार हांणी सांगलें, सोसायटींत ह्यान पयलींच सुमार अडेज हजार कर्मचारी तात्पुरते नेमिल्ले. हातुंतले कांय कर्मचारी निवृत्त जावपाक पावल्यात, तरी ते कन्फर्म नात. कांय कर्मचारी नियमीत कर्मचार्यां प्रमाण डेटा ऑपरेटर, बिलिंग क्लार्क अशीं कामां करतात. मात तांकां नियमीत कर्मचार्यां परस उणें वेतन मेळटा. असल्या कर्मचार्यांक कायम करचे आनी तो मेरेन नियमीत कर्मचार्यां प्रमाण पगार दिवचो, ह्या मगाण्यां खातीर आमी कितलींशींच वर्सां जालीं आंदोलन करतात. हे विशीं आमची सरकारा वांगडा चर्चा सुरू आसा. ही परिस्थिती खबर आसतनाय रोजंदारी पद्धतीन भरती खातीर जायरात दिवप हें चुकीचें.
तांणी म्हणलें, दिसवडो पद्धतीन भरती जाल्यार गोंयकार तरणाट्यांक कसलेच तरेचो फायदो जावचो ना. मंत्री २२ हजार सरकारी पदां रितीं आशिल्ल्याचें सांगतात. मात सुवातो भरतना दिसवडो पद्धतीची निवड करतात. सरकारान २२ हजार रितीं पदां अशेच भरतले काय? हें स्पश्ट करचें. वेंचणुकेचे फाटभूंयेर तरणाट्यांक सरकारी नोकरीचें गाजर दाखलां. दिसवड्याचेर काम केल्यार तरणाटे लाचार जातले. तरणाट्यांनी हे जायरातीक बळी पडचें न्हय. आतां सरकारी नोकरी मेळ्ळी तरी सरकार ह्या तरणाट्यांक केन्नाच नियमीत करचें ना, अशें स्पश्ट दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
