भांगरभूंय | प्रतिनिधी
पावसा खातीर लोकां कडल्यान देवाक गाराणीं
पणजी : मॉन्सूनाचें आगमन जावन पंदरा दीस जाले जरी आसले तरी आजून पावस नाशिल्ल्यान हुस्क्याची स्थिती कायम आसा. आयतारा दिसभर दमट हवामान आशिल्लें. सत्तरी सयत कांय वाठारांनी पावस मात्सो शिडशिडलो मात दडको काय पडल्यो नात. हवामान खात्यान सोमार (२२ जून) आनी मंगळारा (२३ जून) पावसाचो येलो एलर्ट जारी केला.
पावस नाशिल्ल्यान शेतकारां खातीर हुस्क्याची स्थिती आसा. पावस पडचो म्हूण सांखळे भाजप किसान मोर्चाच्या वांगड्यांनी देवा कडेन गाराणें घातलें. पावसा खातीर आयज चर्चीनी लेगीत प्रार्थना जातल्यो.
आयतारा कांय कडेन पावस शिडशिडलो. पावस पडपाचें वातावरण आशिल्लें. मात दनपार मेरेन पावसाच्यो दडको आयल्यो नात. आजून मेरेन राज्यांत फकत १६७.५ मीमी (६.५९ इंच) पावसाची नोंद जाल्या. हे प्रमाण ७२ टक्के उणें आसा. फकत १० जुनाक सगळ्यांत चड म्हणजे २४.७ मीमी पावसाची नोंद जाल्ली. एकूय दिस १ इंचा परस चड पावसाची नोंद जावंक ना. धरणांनी म्हयनो भर पुराय जातलें इतलें उदक आशिल्ल्याचो दावो सरकारान केला आसलो तरी अंजुणें धरणांत उदकाची पातळी सामकी उणी जाल्या. पेरणी करपा खातीर शेतकार पावसाची वाट पळयतात. पावसा खातीर देवाकडेन गार्हाणीं घालपाक शेतकारांनी सुरवात केल्या. पावस नाशिल्ल्यान अंदूं पेरणीक कळाव जावन शेतीच्या सगळ्या कामांक उशीर जातलो.
आतां मेरेन फकत काणकोणा सगळ्यांत चड ४११ मीमी (१६.१८ इंच) पावसाची नोंद जाल्या. सगळ्यांत उणो पावस फोंडें ९१.९ मीमी (३.६१ इंच) पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
