भांगरभूंय | प्रतिनिधी
खाशेल्या शाळेंत आठ दीस स्वयंसेवक म्हणून सेवा दिवपाचे राज्य दिव्यांग आयुक्त कार्यालयाचे निर्देश
पणजी ः कॅनरा बँकेच्या पर्वरी शाखेंतल्या वेवस्थापका कडल्यान एका दिव्यांग व्यक्तीच्या बापायक बँक शाखा अपमानकारक आनी भेदभाव करपी वागणूक मेळ्ळ्या अशी कागाळ दाखल जाल्ली. हाका लागून नागरिकांचे हक्क आनी स्वाभिमान राखपाची गरज हे घडणुकेंतल्यान स्पश्ट जाता. उल्लेख केल्ल्या कागाळीचेर निर्णय दितना सगळ्यांक खातीर, खास करून दिव्यांग व्यक्तींक न्याय दिवपाक राज्याच्या दिव्यांगजन आयुक्ताच्या कार्यालयान म्हत्वाची भुमिका केली.
24 जुलय 2024 दिसा जाल्ले सुनावणेंत दिव्यांग आयुक्ताच्या कार्यालयान दिल्लो आदेश फकत ह्या एकाच घडणुके मेरेन मर्यादीत ना जाल्यार भौशीक क्षेत्रांतल्या सगळ्या व्यक्तींक मान दिवन तांचो आदर करपाचो, बरी वागणूक दिवची अशा संस्कृतायेक प्रोत्साहन दिवपी आसा.
दिव्यांग व्यक्तीं विशीं सहानुभूती, समजूत आनी आदर रुजोवपा खातीर खाशेल्या शाळांनी आठ दीस स्वयंसेवक म्हणून सेवा दिवची अशें स्पश्ट निर्देश राज्य दिव्यांग आयुक्त कार्यालयान दिल्यात. तशेंच उल्लेख केल्ल्या बँकेच्या सद्याच्या वेवस्थापकान लेखी स्वरुपांत माफीनामो सादर करप सक्तीचें केलां आनी हो माफीनामो बँकेच्या आवारांत प्रदर्शित करप गरजेचें आसा. तशेंच माफीनाम्यांत वेव्हार चुकीचो आशिल्लो अशें स्पश्टपणान सांगचें आनी आदरयुक्त वेव्हार करपाचें वचन दिवपाची हमी नमूद करची अशें ह्या निर्देशांत म्हणलां.
भारतीय रिझर्व्ह बँकेच्या सहकार्यान फुडल्या स म्हयन्यांत सगल्या बँक कर्मचाऱ्यां खातीर दिव्यांग आशिल्ल्या व्यक्तींच्या हक्कां विशीं संवेदनशीलताय आनी जागृताय प्रशिक्षण घडोवन हाडप आनी बँक कर्मचाऱ्यांक ते विशीं जाणविकाय करुन दिवप गरजेचें आसा अशेंय निर्देश ह्या वेळार दिले.
हे संबंदी दिव्यांग आशिल्ल्या व्यक्तीं खातीर राज्य आयुक्त गुरूप्रसाद पावसकार हांणी म्हणलें, कागाळदाराचो अणभव पळयल्यार सांगिल्ले निर्देश चड न्यायाक चालना दिवपाक आनी फुडाराक अशीं घडणुको घडच्यो न्हय म्हणून संवेदनशील समाज तयार करपाक म्हत्वाचे थारतले. याचिकादाराचो जाल्लो अपमान आनी ताका मेळिल्ली वागणूक पयस करपाचो यत्न ह्या निर्देशांतल्यान जाला. ह्या निर्देशाची अंमलबजावणी करपा खातीर उल्लेख केल्लें कार्यालय नेमान फाटपुरवण करतलें. अंमलबजावणी संबंदी अहवाल तीन म्हयन्यां भितर सादर करपाचो अशेंय आदेशांत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
