भांगरभूंय | प्रतिनिधी
पणजी : राज्यांतल्या कांय शिक्षणीक संस्थांनी दिव्यांग भुरग्यांचो प्रवेश न्हयकारपा संबंदीच्यो कागाळी पालकां कडल्यान आयिल्ल्यो. ताची दखल गोंय राज्य दिव्यांगजन आयुक्त कार्यालयान घेतल्या. शिक्षणीक प्रवेशांत दिव्यांगत्वा वयल्यान भेदभाव जाल्ले विशीं नोंद घडणुकांचे फाटभूंयेर राज्य दिव्यांगजन आयुक्त कार्यालयान आतां शिक्षण संचालनालय, उच्च शिक्षण संचालनालय, तंत्रशिक्षण संचालनालय तशेंच कुशळटाय उदरगत आनी उद्देजकता संचालनालय हांकां स्पश्ट निर्देश जारी केल्यात. नव्या शिक्षणीक वर्साची प्रवेश प्रक्रिया सुरू जातना दिव्यांगांच्या अधिकारांचें आनी हिताचें संरक्षण करप सामकें गरजेचें आशिल्ल्याचें, ह्या आदेशांत नमूद केलां.
हे निर्देश पाळीनाशिल्ल्या संस्थांक, मागीर त्यो अनुदानीत वा मान्यताय मेळिल्ल्यो आसूं, तांकां दिल्लें अनुदान वा अनुदानाच्या रुपांत मेळपी मजत बंद करची, अशे निर्देश राज्य दिव्यांगजन आयुक्त कार्यालयान दिल्यात. राष्ट्रीय दिव्यांगजन अधिकार कायदो-२०१६, शिक्षणाचो अधिकार आनी राष्ट्रीय शिक्षणीक धोरण २०२० ह्या कायद्यांतल्या तरतुदींच्या अनुशंगान सगळ्या दिव्यांगजनाचो फुडार राखपाच्या उद्देशान सदरचे निर्देश जारी केल्यात. ह्या निर्देशांची प्रभावी अंमलबजावणी करपाक आतां सगळ्या संबंदीत विभाग आनी कार्यालयांनी आपल्या अधिकार क्षेत्रांतल्या सगळ्या शिक्षणीक संस्थांक गरजेचे निर्देश जारी करप गरजेचें थारतलें.
जारी केल्ल्या निर्देशां विशीं राज्य दिव्यांगजन आयुक्त गुरुप्रसाद पावसकार हांणी, समावेशन हे फकत धोरण न्हय, तर हें दरेका नागरिकाचो अधिकार. कांय शिक्षणीक संस्था वरवीं दिव्यांग विद्यार्थ्यांक सेगीत प्रवेश न्हयकारप ही गजाल स्विकारपा सारकी ना. राष्ट्रीय दिव्यांगजन अधिकार कायदो-२०१६ न पाळपी आसा. दरेका भुरग्याक, तांचे भितरले तांकीच्या आदाराचेर दर्जेदार शिक्षण मेळप सुनिश्चीत करपा कडेन आमचो ध्यास आशिल्लो. हे निर्देश पाळी नाशिल्ल्या वा पाळपाक बोवाळ करपी संस्थांचेर खर कारवाय करतले. सगळ्या विद्यार्थ्यां खातीर आदरयुक्त आनी सक्षम शिक्षणीक वातावरण निर्माण करप हें आमचें ध्येय आसा अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
