भांगरभूंय | प्रतिनिधी
नांवनोंदणेची निमाणी तारीख 12 ऑगस्ट
पणजी ः भारताच्या स्वातंत्र्य दिसा निमतान राज्य दिव्यांगजन आयुक्तान डिसेबिलिटी अलायन्स फॉर इन्क्लुझिव गोवा, आनी रोटरी क्लब ऑफ पणजी रिव्हिएरा हांच्या सहकार्यान फकत दिव्यांगां खातीर अखील गोंय देशभक्ती कराओके गायन सर्तींचे आयोजन केलां. ‘हर घर तिरंगा’ मोहिमे खाला राज्य दिव्यांजन आयुक्त आनी दिव्यांजन सशक्तीकरण खातें ही सर्त घडोवन हाडटा. ही सर्त 15 ऑगस्ट दिसा पर्वरेच्या संजय सेंटर फॉर स्पेशल एज्युकेशनांत सकाळीं 9.30 वरांचेर सुरू जातली.
दिव्यांग व्यक्तीं खातीर आपली गायन कला दाखोवपाक आनी आपली देशभक्ती उक्तावपाक ही सर्त एक बरी संद आसतली. सर्तकांनी सर्तीच्या दिसा सकाळीं 9 वरां मेरेन स्थळार पावपाक जाय. सर्तक आपले आवडीचें देशभक्तीचें गीत कोंकणी, मराठी, हिंदी वा इंग्लीश भाशेंत सादर करूं शकता. दरेका सर्तकाक आपलो कराओके ट्रॅक हाडचो पडटलो आनी पांच मिनटां भितर सादरीकरण करचें पडटलें.
गीत निवड, स्पश्टताय, आत्मविस्वास, चाल (सूर), ताल आनी एकंदरात सादरीकरण ह्या निकशाचेर परिक्षक निकाल दितलें. खाशेल्या शाळांनी आपल्या दरेका शाळेंतल्यान फकत एक प्रवेशिका धाडची पडटली, म्हळ्यार एका संस्थेच्यो जायत्यो शाळा आसल्यार दरेक शाळेचो फकत एकच प्रतिनिधी सर्तींत वांटो घेवंक शकता.
इनामां वांटप सुवाळ्यान सर्तीचो समारोप जातलो. सर्तींत पयल्या तीन क्रमांका खातीर दरेकीं एक आनी तीन उत्तेजनार्थ मेळून 6 इनामां दितले.
वांटो घेवपा खातीर सर्तकांनी आपलें युडीआयडी कार्ड वा वळखपत्र हाडून ते सादर करप गरजेचें आसा. हे सर्तींत वांटो घेवपी सगल्या सर्तकांक वांटेकार जाल्ल्याचे प्रमाणपत्र दितले. हे सर्तींत नांव नोंदणी करपाची निमाणी तारीख 12 ऑगस्ट. चड म्हायती खातीर मंजिरी जोग 95183 26938 ह्या नंबराचेर संपर्क करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
