भांगरभूंय | प्रतिनिधी
विवीधतायेचो उत्सव आशिल्ल्या पर्पल फेस्ताचो निमाणो आनी तिसरो दीस खेळां सर्तींनी गाजलो. वेगवेगळ्यो कार्यशाळा, सांस्कृतीक कार्यावळीं वरवीं हो महोत्सव याद उरपा सारको जालो.
महोत्सवाचें वेळापत्रक जरी खूब व्यस्त आसलें तरी ह्या महोत्सवांत वांटो घेवपी सर्तक आनी प्रेक्षक सकारात्मक विचारांची व्हडली भावना, अडचणी पयस करपाची जिद्द आनी हातूंतल्या चडांत चड कार्यावळींनी वांटो घेवन समावेशकतायेचो विचार एकठांय करताना दिसले. एकूणच हो महोत्सव सगळ्यांक प्रेरणादायक, याद उरपा सारको, आनंद दिवपी आशिल्लो.
देशभरांतल्या दिव्यांग व्यक्तीं वांगडा तांच्या पालकांनी, शाळेच्या भुरग्यांनी आनी गोंयच्या कलाकारांनी ह्या सुवाळ्याचो आनंद घेतलो. पांच हजारां वयर प्रतिनिधी ह्या वेळार हजर आशिल्ले. दिव्यांगांच्या मनोहारी रंगांत हें फेस्त रंगिल्लें.
पयर आयतारा आयनॉक्स कोर्टयार्डांत पर्पल फेस्ता समारोप सुवाळ्यांत मुख्यमंत्री डॉ. प्रमोद सावंत, केंद्रीय पर्यटन राज्यमंत्री श्रीपाद नायक, समाज कल्याण मंत्री सुभाष फळदेसाय, पर्यटन मंत्री रोहन खंवटे, भौशीक बांदकाम मंत्री निलेश काब्राल, आमदार दिगंबर कामत, भाजपा प्रदेश अध्यक्ष सदानंद शेट तानावडे, सचीव सुभाष चंद्र (आयएएस), दिव्यांग व्यक्ती खातीरचे राज्य आयुक्त गुरुप्रसाद पावस्कार, राज्य आयुक्त कार्यालयाचे सचीव ताहा हाजिक हाजीर
आशिल्ले.
डॉ. प्रमोद सावंत हांणी म्हणलें, जागृताय मेळाव्याक हांव भेट दिली. सगळ्यो एनजीओ दिव्यांग व्यक्तींच्या पालकांक मजत करताल्यो. ही सकारात्मकताय, समावेशकता पळोवन म्हाका खूब धादोसकाय भोगली.
श्रीपाद नायक हांणी म्हणलें, आतां समाजान दिव्यांग मनशाक सहजपणान स्विकारपाक सुरवात केल्या. ह्या व्यक्तींकय मान आनी संदी मेळपाक लागल्यात. पर्पल फेस्ट उपक्रम हो ह्या बदलत्या चित्राची एक मुखेल देख.
सुभाष फळदेसाय हांणी म्हणलें, महोत्सवांत आपयिल्ल्या नामनेच्या वक्त्यांनी दिव्यांगताय आशिल्ल्यांक समाजीक, अर्थीक आनी शिक्षणीक नदरेन सशक्त जावपाक उर्बा दिली. तांकां सगळ्यांत बरी शिक्षणीक सुविधा, सुरक्षा, संरक्षण दिवपाचो आमी यत्न करतात. धोरणात्मक नदरेन बरे कायदे करपाचे सकारात्मक यत्न करतात.
निमाण्या दिसाच्यो घडणुको
पर्पल डायलाॅग संवाद उपक्रमांत मुळाव्या साधनसुविधांची सुलभताय, संज्ञानात्मक (चेतना) अपंगत्व, म्हाका समजून घेयात, आमच्या उपरांत कितें?, रगताची उणीव, दिव्यांगांची सक्रियताय आनी सोशल मिडिया, दिव्यांग व्यक्तींचे लिंग प्रस्न आदी विशयांचेर परिसंवाद आशिल्ले.
दिव्यांगताय, लिंग आनी लैंगीकताय, दिव्यांगाच्या हक्कां विशीं आनी समावेश धोरणाचेर नामनेच्या वक्त्यांनी पॅनल चर्चा केली. सोशल मिडिया दिव्यांग लोकांक आपलें ध्येय साध्य करपाक कशी उपेगी साधन जावंक शकता
हाचेरय चर्चा जाली. लोकांक एकठांय हाडपाचे मार्ग
सोदपा खातीर सोशल मिडियाची तांक कितली आसा हाचेर तज्ञ आनी कार्यकर्त्यांनी भासाभास केली.
पर्पल थिंक टॅंक
मेकळ्या मनाचे मनीस जेन्ना प्रामाणीकपणान संवाद सादतात तेन्ना ते सुरक्षीत सुवात आनी येवकार दिवपी वातावरण तयार करतात. पर्पल थिंक टॅंक उपक्रमान व्याख्यानां आनी परिसंवादांची माळय घडोवन हाडली. हातूंत सेतू संस्थेंतल्या विकासात्मक बालरोग चिकित्सक डॉ. नंदिता डिसूझा आनी नेहा त्रिवेदी हांणी भारताक उपेगी पडूं येता अशा समावेशी शिक्षणाचेर मार्गदर्शन दिलें. दिव्यांगांच्या सर्वांगी उदरगती खातीर समावेशक शिक्षण, वेगवेगळ्या प्रकारच्या दिव्यांगां खातीर रोजगार धोरणाची गरज, समान संदी आनी उदरनिर्वाह उदरगत ह्या प्रस्नांचेर तांणी विस्तारान सांगलें.
ह्या प्रकारांत पयलेच खेपे जाल्ल्या ह्या तीन दिसांचे कार्यावळीन दिव्यांग व्यक्तीं खातीर समावेशक धोरण करपा खातीर पयल्या वर्सा जायते मापदंड थारायले आनी दिव्यांग लोकांक नवी फांतोड दाखयिल्ल्या ह्या सुवाळ्याचो समारोप आयतारा जालो. दिव्यांगां मदीं एक उर्बा, उर्जा, उमेद आनी उमशळीक जागोवन.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
