भांगरभूंय | प्रतिनिधी
दिव्यांगांक वाटल्यो ३२ इलेक्ट्रिक स्कुटरी
पणजी: दिव्यांगांक गरजेची साधनां आनी उपकरणां फुकट दिवपाक सरकार बांदील आशिल्ल्याचें मुख्यमंत्री डॉ. प्रमोद सावंत हांणी सांगलें.
आयज सचिवालयांत हिंदुस्तान पेट्रोलियम कॉर्पोरेशन लिमिटेडच्या समाजीक बांदिलकी उपक्रमा खाला दिव्यांग व्यक्तींक निओ फ्लाय आनी निओ बोल्ट कंपनीच्या वट्ट ३२ स्कुटरींचें वांटप जालें. त्या वेळार मुख्यमंत्री उलयताले. संजय स्कूल फॉर स्पेशल एज्युकेशन सेंटरांतल्या विशेश विद्यार्थ्यांक आवाजाची सुविधा आशिल्ले १२ टॅब्लेटूय भेटयले.
दिव्यांगांक मजत केल्ले खातीर मुख्यमंत्र्यान एचपीसीएलचे उपकार मानले आनी रेट्रोफिट आधुनीक इलेक्ट्रीक दुचाकींक लागून दिव्यांग व्यक्तींचे जिणेंत स्वावलंबन आनी सोंपेपण येवन ती सुदारपाक मदत जातली, अशें सांगलें.
समाजकल्याण मंत्री सुभाष फळदेसाय हांणी समाजीक बांदिलकीच्या उपक्रमा खातीर एचपीसीएल पेट्रोलियमचे उपकार मानले. शारीरिक नदरेन दिव्यांग आशिल्ले मोबाईल शॉप धनी इरफान हांचें उदाहरण दिवन रेट्रोफिट केल्ल्या दुचाकींक लागून दिव्यांग व्यक्तीन प्रवास करतना दुसर्याचेर निंबून रावनासतना कशें स्वावलंबी जावपाक मदत जातली, हे पटोवन दिलें.
ह्या वेळार सभापती रमेश तवडकार, आमदार डॉ. देविया राणे, चंद्रकांत शेट्ये, प्रेमेंद्र शेट, दिगंबर कामत, दाजी साळकार, समाज कल्याण सचीव ई. वल्लावन, गोंय राज्य दिव्यांग आयुक्त गुरुप्रसाद पावसकार, आयोगाचे सचीव ताहा हाजिक, कंपनीचे कार्यकारी संचालक राजीव गोयल, सरवेवस्थापक पेंडर बाबा, वेवस्थापक शशांक तिवारी, श्रुती पालन आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
