भांगरभूंय | प्रतिनिधी
पणजी: दिवचल न्हंयचो गाळ उसपून 15 वर्सां जाल्यार व्हाळवाट न्हंयचो गाळ उसपून 9 वर्सां जालीं. हाका लागून न्हंयांचें पात्र उणें जालां. पावसांत लागींच्या रस्त्यांचेर उदक येता. ते खातीर दोनूय न्हंयांचो गाळ उसपुचो अशी मागणी आमदार डॉ. चंद्रकांत शेट्ये आनी प्रेमेंद्र शेट हांणी केली. मंगळारा डॉ. दिव्या राणे हांचे लक्ष्यवेधी सुचोवणेचेर ते उलयताले.
डॉ. शेट्ये हांणी म्हणलें, पावसाच्या दिसांनी दिवचले साळ, नानोडें जंक्शन हांगा उदक भारता. ह्या वर्सा शांतादुर्गा जंक्शनार उदक सांचिल्लें. हांगासरल्या नाल्यांतल्यान उदक न्हंयेंत वता. पूण गाळ उसपूंक नाशिल्ल्यान न्हंयेचे उदक वचना. तशेंच हांगासरल्या बांदार कायमस्वरुपी पंपींग केंद्र बसोवप गरजेचें आसा. तशेंच साळांत राखणे वणत आनी पंपींग केंद्र बसयल्यार उदक सांचून उरपाचें प्रमाण उणें जावंक शकता.
प्रेमेंद्र शेट हांणी म्हणलें, हाचे पयलीं लेगीत राज्याक पावसाचो धक्को बसला. हाचे मुखार उटंगाराच्या पावसाची शक्यताय आसा. हालींच दिवचल आगनी व्हाळवाट न्हंयांक हुंवार आयिल्ल्यान कारापूर सर्वण आनी कुडचिरे ह्या गांवांक फटको बसलो. हांगा गाळ उसपिलो ना जाल्यार फुडारांत लेगीत ही समस्या कायम उरतली. आपत्ती वेवस्थापन प्राधिकरणान हांगा भेट दिवन जाल्ले लुकसाणेचो नियाळ घेवचो. तशेंच हांगासरले रस्ते आनी बांद दुरुस्त करचे.
तुळशीमळा रस्त्याची
दुरुस्ती करची: डॉ. राणे
आमदार डॉ. दिव्या राणे हांणी म्हणलें, पावसाक लागून व्हाळवाट न्हंयची पातळी वाडिल्ल्यान तुळशीमळाचो रस्तो पेड्डेर जाला. हो रास्तो राष्ट्रीय म्हामार्गार येत आशिल्ल्यान हाची रोखडीच दुरुस्ती करप गरजेची आसा. तशेंच हांगासरले न्हंयेचे देगेर राखणे वण्टीची दुरुस्ती करपी लेगीत गरजेची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
