भांगरभूंय | प्रतिनिधी
बसकेक 14 मदलो एकलोय नगरसेवक आयलो ना
दिवचल, प्रतिनिधी ः दिवचलचे नगराध्यक्ष कुंदन फळारी हांचे आड दाखल केल्लो अविस्वास थाराव हुबलो. सगळे नगरसेवक गैरहाजीर रावले. उपजिल्होधिकारी रोहन कासकार, मुखेल अधिकारी सचिन देसाय निर्वाचन अधिकारी म्हणून हाजीर आशिल्ले.
11 ते 11.30 ह्या थारायिल्ल्या वेळार एकूय नगरसेवक हाजीर नाशिल्लो. ताका लागून निर्वाचन अधिकारी कासकार हांणी उल्लेख केल्ल्या प्रक्रियेचो अहवाल तयार करून तो नगरपालिका प्रशासनाक धाडटलों अशें स्पश्ट केलें. एकूय नगरसेवक हाजीर रावंक नाशिल्ल्यान नगराध्यक्ष फळारी हांचे पद कायम उरतलें.
मजगतीं, आतां राजकी घडामोडीक परतून नेट येतलो. कांय दिसांनी मुख्यमंत्री आनी आमदार हांची खाशेली बसका जातली आनी तांतूत फुडलो निर्णय जातलो अशी अपेक्षा आसा.
मजगतीं, नगराध्यक्ष आनी उपनगराध्यक्ष हांचे संबंदी शेनवारा जाल्ले मुख्यमंत्री, आमदार आनी प्रदेश अध्यक्ष हांच्या संयुक्त बसकेंत थारायिल्ले प्रमाण हे संबंदी सगल्या नगरसेवकांक विस्वासांत घेवनूच फुडले सगले निर्णय घेतले, अशें सांगलें.
नगराध्यक्ष फळारी हांणी फुडारी सांगतले तो निर्णय घेवपाक हांव तयार आसां. फाटलीं चार वर्सां हांवें प्रामाणीक पणान सेवा दिवपाचो यत्न केला. सगळ्या पक्षांक न्याय दिला आनी उदरगतीकय चालना दिल्या अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
