भांगरभूंय | प्रतिनिधी
दिवचल क्रिकेट क्लबान सेगीत दुसऱ्या वर्सा बांदोडकार करंड क्रिकेट सर्त जिखली. फायनलींत ताणें इक्बाल इलेव्हनाक 68 धांवड्यांनी हारयलो. पणजी जिमखानान सर्तीचें आयोजन केल्लें. दिवचल क्रिकेट क्लबाच्या जैतांत आलम खान पर्जळ्ळो. ताची मॅन ऑफ द प्लेयर पुरस्कारा खातीर निवड जाली.
कांपाला वयल्या भाऊसाहेब बांदोडकार मैदानाचेर दिवचल क्रिकेट क्लबान पयलीं बॅटींग करतना आलम खानाच्या अर्द शेंकड्या नेटार 4 विकेटी वगडावन 197 धांवड्यो केल्यो. ते उपरांत इक्बाल इलेव्हनाचो डाव 129 धांवड्यांचेर सोंपयलो.
ह्या जैतान दिवचल क्रिकेट क्लबाक 50 हजाराचें इनाम आनी करंड फावो जालो. जाल्यार उप वस्ताद इक्बाल इलेव्हनाक 25 हजाराचें इनाम आनी करंडाचेर समाधान मानचें पडलें. हाचे खेरीत आलम खान (मॅन ऑफ द मॅच, आलम खान), इम्रान मुल्ला (उत्कृश्ट बॅट्समन, इक्बाल इलेव्हन), गौरेश नागवेंकार (उत्कृश्ट बॉलर, दिवचल क्रिकेट क्लब), शुभम नायक (सर्तींतलो उत्कृश्ट खेळगडो, इक्बाल इलेव्हन) हांकां वैयक्तीक बक्षिसांतर्गत 5 हजार आनी करंड फावो जाले.
गोंयचे पयले मुख्यमंत्री भाऊसाहेब बांदोडकार हांचें जांवय श्री. वेंगुर्लेकार, नातू गिरिराज वेंगुर्लेकार, पणजी जिमखानाचे अध्यक्ष मनोज काकुलो, भांडारी सुरेश कारापूरकार, वांगडी प्रशांत काकोडे, गोंय क्रिकेट असोसिएशनाचे वांगडी राजेश पाटणेंकार, अब्दुल माजीद हे इनामां भेटवण सुवाळ्याक उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
