भांगरभूंय | प्रतिनिधी
लोकां मदीं भिरांत; लमाणी भाजी विक्रेत्यांक बाजारांत बसपाक दिवची न्हय अशी मागणी
भांगरभूंय । प्रतिनिधी
दिवचलः दिवचले बुधवारा सप्तकी बाजारांत भाजी विकपी लमाण्यांनी परतून एकदां दहशत माजयली. रातच्या वेळार दोन गटां मदीं ‘फ्रिस्टायल फायट’ लोकांनी अणभवली. दांडें, वारांव घेवन जाल्ले मारामारींत बाजाराक आयिल्ल्या लोकांची खूब धांवपळ जाली. हे दहशतीक लागून बाजारांत तणाव निर्माण जाल्लो. ह्या प्रकाराक लागून हे मुखार दिवचलच्या बाजारांत लमाणी भाजी विक्रेत्यांक बसपाक दिवचेंच न्हय, अशी मागणी बाजारांतल्या थळाव्या विक्रेत्यांनी केल्या.
पोरूं डिसेंबरांत अशेच तरेन दिवचलच्या सप्तकी बाजारांत लमाणी भाजी विक्रेत्यांच्या गटांत मारामारी जाल्ली. त्या वेळार लेगीत दांडें, वारांव घेवन मारामारी केल्ली. तेचवी लोखंडाचीं वजनां लेगीत मोखून मारिल्लीं. ते मारामारींत कांय लोकांक मार लेगीत बशिल्लो जाल्यार कांय जाण जखमीय जाल्ले. त्या वेळार लेगीत लमाणी भाजी विक्रेत्यांक दिवचल बाजारांत बसपाक दिवचे न्हय, अशी मागणी थळाव्या विक्रेत्यांनी तशेंच लोकांनी केल्ली. दिवचल पालिकेन हाची गंभीर दखल घेवन लमाणींक बाजारांत बसपाक मनाय केल्ली. पूण ते उपरांत ल्हवू ल्हवू लमाणी भाजी विक्रेत्यांनी बाजारांत परतून रीग केली आनी उपरांत बिनधास्त बसपाक लागले. पूण लमाणी भाजी विक्रेत्यां मदीं केन्ना केन्ना झगडीं, किजिलां जातालीं. ताका लागून लोकां मदीं भिरांतीचें वातारवण निर्माण जातालें. ह्या बुधवारा मात व्हड प्रमाणांत मारामारी जाल्ल्यान लोक भियेल्यात. मारामारी करतना तांणी दांडें, वारावांचो वापर केल्लो. हें पळोवन बाजाराक आयिल्ले लोक वाट मेळत ते वटेन पळटाले.
ह्या प्रकरणाची म्हायती दिवचले नगराध्यक्ष कुंदन फळारी हांकां मेळटाच ते पुलिसांक घेवन बाजारांत पावले. पूण ते मेरेन मारामारी करपी पळून गेल्ले. तांची म्हायती कांय जाणांनी पुलिशेक दिल्यात, ताका लागून ते सांपडूंक शकतात. ह्या सगळ्या प्रकाराक लागून दिवचल बाजारांत तिडकीची प्रतिक्रिया आयकुपाक मेळटा. ह्या लमाणी भाजी विक्रेत्यांची धगडीं दर दोन सप्तकांत जाताच. ताचो त्रास लोकांक जाता. ताका लागून तांकां बाजारांत बसपाक सुवात दिवचीच न्हय, अशी मागणी लोकांनी केल्या.
मारामारी करपी बसकेक गैरहाजीर
मारामारी करपी बसकेक गैरहाजीर
बिरेस्तारा म्हणल्यार 1 डिसेंबराक दिवचलच्या सप्तकी बाजारांत बसपी सगळ्या लमाणी भाजी विक्रेत्यांक बसके खातीर आपयिल्ले. हे बसकेक ते मारामारी करपी आयलेच ना. कांय भाजी विक्रेत्यांनी आपूण शांततायेन वेवसाय करतात अशें सांगलें आनी जे बाजारांत झगडीं- किजिलां करतात, मारामारी करतात तांकां बसपाक दिवचे न्हय, अशी मागणी नगराध्यक्षां कडेन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
