भांगरभूंय | प्रतिनिधी
नवी दिल्ली: देशाची राजधानी दिल्ली शाराक आतंकवादी हल्ल्याचो अलर्ट दिला. गुप्तचर संस्थांनी हो अलर्ट दिला आनी धोको पळोवन म्हत्वाच्या सुवातांची सुरक्षा वाडयल्या. तशेंच भाजपाच्या मुख्यालयाची सुरक्षितताय वाडयल्या. सध्या केंद्रीय पुलीस दळा वांगडा दिल्ली पुलीस कर्मचार्यांक म्हत्वाच्या सुवातींनी तैनात केल्यात आनी शारांत सगळे कडेन सादूरताय दवरल्या. खुबश्या सुवातांचेर नाकाबंदी करून गाडयो आडावन तांची तपासणी करप चालू आसा, अशी म्हायती मेळ्ळ्या.
मेळिल्ले म्हायती प्रमाण दिल्लींतल्या राज्य भाजपा कार्यालयाचेर आतंकवादी हल्लो जावपाची शक्यताय आसा असो अलर्ट दिला. हे फाटभुंयेर वाठारांत खर सुरक्षा वेवस्था केल्या. डीडीयू रस्त्यार आशिल्ल्या दिल्ली भाजपाचें मुखेल कार्यालय आनी लागसारच्या सरकारी कार्यालयांचेर आतंकवाद्यांनी निशाणो करूं येता. ही शिटकावणी मेळ्ळे उपरांत सुरक्षा एजन्सींक हाय अलर्टांत दवरल्यात. ताका लागून दिल्ली पुलिसां वांगडा अर्द सैनीक दळांची नेमणूक जाल्या. एजन्सी कडेन मेळिल्ले म्हायती प्रमाण दिल्ली भाजपा कार्यालय आनी सरकारी संस्थांचेर आतंकवादी संघटना निशाणें करपाक शकतात. धोको पळोवन खंयच्याय आपत्कालीन परिस्थितीक बेगोबेग प्रतिसाद दिवपा खातीर पुराय वाठारांत व्हड पुलीस दळ तैनात केलां.
भाजपाच्या मुख्यालयाच्या भायर अतिरिक्त सुरक्षा
मजगतीं, हल्ल्याचे शिटकावणी उपरांत भाजपाच्या मुखेल कार्यालया भायर अतिरिक्त सुरक्षा वाडयल्या. दिल्ली पुलिसां वांगडा अर्द सैनीक दळय तैनात केल्यात. दिल्ली पुलिसांनी वाठारांत बॅरिगेट्स घाल्या आनी गाडयो आडावन पुराय तपासणीय करतात. कार बॉम्ब, फायरिंग, आयईडी लावप, आत्मघाती बॉम्बस्फोट अशीं रणनिती वापरून आतंकवादी संघटना हो हल्लो करपाक शकतात. हे शिटकावणी उपरांत तपास एजन्सी सतत सतर्क आसात. लोकांक सुरक्षीत सुवातेर रावपाचेंय आवाहन केलां.
टॅररिस्ट अटॅक अलर्ट
दिल्ली पुलीस आनी थळाव्या तपास एजन्सीनी दिल्ले अलर्ट शिटकावणी उपरांत भाजपा कार्यालयाच्या वाठारांत सुरक्षा वाडयल्या. वाठारांतल्या लोकांक सादूर रावपाचो सल्लो दिला. लोकांनी घरांत रावून सुरक्षीत आलाशिरो घेवचो असो उलो प्रशासनान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
