भांगरभूंय | प्रतिनिधी
दिल्ली कॅपिटल्सान बायलांचे प्रिमीयर लिगेंत (डब्यूपीएल) सेगीत दुसऱ्या जैताची नोंद केली. हांगाच्या डॉ. डी व्हाय पाटील स्टेडियमाचेर जाल्ले मॅचींत युपी वॉरियर्साक 42 धांवड्यांनी हारयलो. दिल्ली कॅपिटल्सान दिल्ले 212 धांवड्यांचे मोखीचो फाटलाव करपी युपी वॉरियर्साक 20 ओव्हरींनी 5 विकेटी वगडावन 169 धांवड्यो करप शक्य जाल्यो. युपी वतीन मॅकग्रान नाबाद 90 धांवड्यो केल्यो.
दिल्ली कॅपिटल्सा वतीन जेस जोनासेनान तीन विकेटी घेतल्यो. ते पयलीं तिणें 20 बॉलांनी नाबाद 42 धांवड्यांची खेळी लेगीत केल्ली. अश्टातासाच्या प्रदर्शनाक लागून तिची प्लेयर ऑफ द मॅच पुरस्कारा खातीर निवड केली.
ते आदीं टॉस हारल्या उपरांत पयलीं बॅटींग करतना दिल्ली कॅपिटल्सान निर्धारीत 20 ओव्हरींनी 4 विकेटी वगडावन 211 धांवड्यो केल्यो.
मुखेली मेग लॅनींग उपरांत जेस जॉन्सन आनी जेमिमा रॉड्रिग्स हांच्या उत्कृश्ट बॅटिंगे नेटार दिल्ली कॅपिटल्सान धांवड्यांचो दोंगर उबारलो.
फाटले मॅचींत युपी वॉरियर्साक फाटले मॅचींत जैत मेळोवन दिवपी ग्रेस हॅरिसाक हे मॅची खातीर पंगडांतल्यान बसयल्या.
मजगतीं, दिल्ली कॅपिटल्सान बरी सुरवात केली. मुखेली लॅनींग आनी ओपनर शेफाली वर्मा हांचे मदीं अर्द शेंकड्याची भागिदारी केली. पूण, शेफाली (17) व्हड शॉर्ट मारपाच्या यत्नांत बाद जाली. पूण, मेगान मुखेलपदाक सोबा सारकी खेळीत करतना 42 बॉलांनी 70 धांवड्यो केल्यो. हातूंत 10 चवके आनी तीन सके मारले. डब्ल्यूबीएलांत सगल्यांत चड धांवड्यो करपी बॅटर थारली. तिचे उपरांत आयिल्ली मारिजाने कॅप आनी अॅलीस कॅप्सी हांणी वळेरेन 16 आनी 21 धांवड्यो केल्यो. जेमिमा रॉड्रिग्स आनी जेस जॉन्सन हांणी अर्द शेंकड्याची भागिदारी करून पंगडाचो स्कोर 200च्या वयर पावयलो. जेमिमाहन 22 बॉलांनी 34 धांवड्यो केल्यो. जाल्यार जेस जॉन्सनान 20 बॉलांनी 42 धांवड्यो केल्यो.
युपी वॉरियर्सा वतीन ताहिला मॅकग्रा, सोफी एक्लेस्टोन, शबनम इस्मायल, राजेश्वरी गायकवाड हांणी दरेकी एक विकेट घेतली.
शबनम इस्मायला कडल्यान युपी वॉरियर्साक खूब आस्त आशिल्ली. पूण, 29 धांवड्यो दिवन तिका फकत एकूच विकेट घेवपाक शक्य जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
