भांगरभूंय | प्रतिनिधी
बायलांचे प्रिमियर लिगेंत (डब्ल्यूपीएल) काल दिल्ली कॅपिटल्सान सेगीत चवथें जैत जोडलें. ताणें सध्याचो वस्ताद मुंबय इंडियन्साक 29 धांवड्यांनी हारयलो.
ह्या जैता सयत दिल्ली कॅपिटल्स गुणतकट्यांत पयले सुवातेर पावलो. ताचे आठ गूण जाल्यात. हांगाच्या अरुण जेटली मैदानाचेर दिल्ली कॅपिटल्सान टॉस हारल्या उपरांत पयली बॅटींग केली. दिल्ली कॅपिटल्सान निर्धारीत 20 ओव्हरींनी 4 विकेटी वगडावन 192 धांवड्यो केल्यो. मुंबय इंडियन्साक 20 ओव्हरींनी 8 विकेटी वगडावन 163 धांवड्यो करप शक्य जाल्यो.
193 धांवड्यांचो फाटलाव करपी मुंबय इंडियन्सान 68 धांवड्यांचेर 5 विकेटी वगडायिल्ल्यो. ओपनर हेली मॅथ्यूज (29) हिका सोडली जाल्यार मुंबयच्या टॉप ऑर्डरांतल्या एकाय बॅटराक व्हड स्कोर करपाक जमलो ना. यास्तिका भाटिया 6, नेटली सिव्हर ब्रंट 5 आनी मुखेली हरमनप्रीत कौर 6 धांवड्यो करून बाद जाली. हे फाटभुंयेर अमेलियान 17 धांवड्यो करून गडगडपी डाव सांबाळपाचो अपेशी यत्न केलो. सकयले सुवाते वयल्या बॅटरांक लेगीत म्हणपा सारकें प्रदर्शन करपाक जमलें ना.
दिल्ली कॅपिटल्सा वतीन जेस जॉन्सनान तीन विकेटी घेतल्यो. जाल्यार मरियम कॅपान दोन विकेटी मेळयल्यो.
टॉस हारल्या उपरांत पयलीं बॅटींग करपी दिल्ली कॅपिटल्साची मुखेली मेग लेनिंगान 53 आनी जेमिमा रॉड्रिग्सान नाबाद 69 धांवड्यो केल्यो. ओपनर शेफाली वर्मान 28 धांवड्यांचें योगदान दिलें. लेनिंग आनी शेफाली हांणी पयले विकेटी खातीर 48 धांवड्यांची भागिदारी केली. लेनिंगान 38 बॉलांनी 53 धांवड्यो केल्यो. तिणें स चवके आनी दोन सके मारले. त्याच वेळार शेफालीन 12 बॉलांनी 38 धांवड्यो केल्यो. तिसरे सुवातेर बॅटिंगेक आयिल्ले एलिस कॅप्सीन 19 धांवड्यो केल्यो. पूण, हेली मॅथ्यूजाचे बॉलिंगेचर ती बाद जाली. जेमिमान 33 बॉलांनी 69 धांवड्यो केल्यो. तिणें आठ चवके आनी तीन सके मारले. शब्निम इस्मायल, सायका इशाक, पुजा वस्त्रकर आनी हेली मॅथ्यूज हांकां दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
