भांगरभूंय | प्रतिनिधी
दिल्ली कॅपिटल्स आनी गुजरात टायटन्स ह्या पंगडां मदीं अजून मेरेन चार मॅची जाल्यात. दोगूय पंगड 2-2 मॅची जिखल्यात. फाटले खेपे दोनूय पंगड अरुण जेटली मैदानाचेर खेळिल्ले. घरच्या मैदानाचेर खेळपी दिल्ली कॅपिटल्साक 6 विकेटींनी हार घेवची पडिल्ली. अंदूं पयले खेपे दोनूय पंगड अहमदाबादाच्या मैदानाचेर एकामेका आड खेळिल्ले. ह्या वेळार दिल्लीन येजमान गुजराताक फकत 89 धांवड्यांचेर आडावन 6 विकेटींनी जैत जोडिल्लें. आतां परतीचे मॅचींत गुजरात हारीचो बदलो घेवपाक इत्सूक आसतलो. ही मॅच दिल्लींत जातली.
गुजराताचे आठ मॅचींतल्यान आठ गूण आसात आनी तो गुणतकट्यांत सवे सुवातेर आसा. दिल्ली कॅपिटल्स फकत तीन जैतांतल्यान स गूण घेवन आठवे सुवातेर आसा. लीग दुसऱ्या टप्प्यांत प्रवेश करता ताका लागून दोनूय पंगड जैत जोडून गुणतकट्यांत वयले सुवातेर वचपाचें तांचेर चेपण आसतलें.
एक-दोन मॅची सोडल्यो जाल्यार गुजराताचो मुखेली शुभमन गील उत्कृश्ट फॉर्मांत आसा. आठ डावांनी 147चे स्ट्रायक रेटीन आनी 43चे सरासरीन दोन अर्द शेंकड्यांचे मजतीन 298 धांवड्यो केल्यात. गिलाचें हें प्रदर्शन आयज दिल्ली आड लेगीत कायम उरपाक शकता. हाचें फाटलें मुखेल कारण म्हणल्यार दिल्लीच्या दरेक बॉलरा आड किमान 135चे स्ट्रायक रेटीन ताणें धांवड्यो केल्यात. दिल्लीचो मुखेल बॉलर कुलदीप यादवा आड ताची स्ट्रायक रेट 161 इतकी आसा. तशेंच कुलदीपा आड तो एकदाय बाद जावंक ना. गिलान खलील अहमद, इशांत शर्मा आनी अक्षर पटेल हांच्या आड वळेरेन 155, 135 आनी 141चे स्ट्रायक रेटीन धांवड्यो केल्यात.
दिल्लीचो फास्ट बॉलर अनरीख नॉर्खिएचो रॅकॉर्ड खाशेलो ना. ताणें कांय मॅचींनी विकेटी घेतल्यात. पूण, सुमार 13चे इकॉनोमीन धांवड्यो दिल्यात. आयचे मॅची वरवीं तो फॉर्मांत येवपाक शकता. ताणें गिलाक चार खेपे बाद केला. जाल्यार गिलान ताच्या आड फकत 11चे सरासरीन धांवड्यो केल्यात. नॉर्खिएन गुजराताचो दुसरो ओपनर वृद्धिमान साहाक दोन खेपे बाद केला. जाल्यार गुजराताचो सगल्यांत आक्रमक बॅट्समन डॅव्हिड मिलरान ताच्या आड फकत 92चे स्ट्रायक रेटीन धांवड्यो केल्यात.
सुरवातीचे तीन डाव सोडले जाल्यार दिल्लीचो ओपनर डॅव्हिड वॉर्नराक कांय खाशेलें प्रदर्शन करपाक जमूंक ना. ताची समस्या फास्ट बॉलर उमेश यादव आनीक वाडोवपाक शकता. पूण, उमेश यादव गुजराता वतीन सुरवातीच्यो कांय मॅची खेळ्ळ्या उपरांत पंगडांतल्यान भायर आसा. पूण, आयचे मॅची खातीर पंगड वेवस्थापन ताका निमाण्या इकरांत सुवात दिवपाक शकता. उमेशान दरेक एक दुसऱ्या डावांत वॉर्नराक बाद करता. 11 डावांनी पांच खेपे ताका बाद केला. वॉर्नरा भशेन पृथ्वी शॉ लेगीत ताच्या आड खेळटना धडपडटा. उमेशान पृथ्वी शॉक तीन खेपे बाद केला. पृथ्वीन उमेशा आड फकत 121चे स्ट्रायक रेटीन धांवड्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
