भांगरभूंय | प्रतिनिधी
मुखेली ऋषभ पंत आनी अक्षर पटेल हांच्या अर्द शेंकड्यां नेटार येजमान दिल्ली कॅपिटल्सान इंडीयन प्रिमीयर लिगेचे (आयपीएल) 40वे मॅचींत गुजरात टायटन्साक 4 धांवड्यांनी हारयलो. दिल्लीचें हें चवथें जैत थारलें. ह्या जैता सयत दिल्लीचे आठ गूण जाले आनी तो गुणतकट्यांत सवे सुवातेर पावलो.
दिल्लीन पयलीं बॅटींग करतना निर्धारीत 20 ओव्हरींनी 4 विकेटी व्हगडावन 224 धांवड्यो केल्यो. गुजरात टायटन्सान मोखीचो फाटलाव करतना निर्धारीत 20 ओव्हरींनी 8 विकेटी व्हगडावन 220 धांवड्यां मेरेन मजल मारली. राशीद खानान नाबाद 21 धांवड्यो केल्यो, डव्हिड मिलरान 55 आनी साई सुदर्शनान 65 धांवड्यांचें योगदान दिलें. दिल्ली वतीन रसीख सलामान तीन, कुलदीप यादवान 2 विकेटी घेतल्यो.
ते आदीं मुखेली ऋषभ पंत (नाबाद 88) आनी अक्षर पटेल (66) हांचे जबरदस्त बॅटिंगे नेटार दिल्ली कॅपिटल्सान निर्धारीत 20 ओव्हरींनी 4 विकेटी व्हगडावन 224 धांवड्यो केल्यो.
गुजरात टायटन्साचो मुखेली शुभमन गील हाणें टॉस जिखून पयलीं बॉलींग करपाचो निर्णय घेतलो. बॅटींग करपाक मैदानांत देंवपी दिल्ली कॅपिटल्सान डावाची सुरवात चवक्यान केली आनी व्हड धांवसंख्या उबारपाची आपली इत्सा दाखोवन दिली. पूण, चवथे ओव्हरींत वॉरियरान जॅक फ्रेझराक बाद करून दिल्लीक पयलो धपको दिलो. नूर अहमदान ताची कॅच धरली. फ्रेझरान 14 बॉलांनी 23 धांवड्यो केल्यो. ताच्या उपरांत पृथ्वी शॉ (11) आनी शाई होप (5) रोखडेच बाद जाले. बिनबाद 35 वयल्यान 3 बाद 44 अशी बिकट स्थिती दिल्लीची जाली. पूण, अक्षर पटेल आनी ऋषभ पंत हांणी फकत डाव सांबाळूंक ना जाल्यार आपल्या पंगडाक व्हड धांवसंख्या उबारून दिवपाक हातभार लायलो. अक्षर पटेलान 43 बॉलांनी पांच चवके आनी चार सक्यांचे मजतीन 66 धांवड्यो केल्यो. 17वे ओव्हरींत नूर अहमदाचे बॉलिंगेर साई किशोरान ताची कॅच धरली.
पंतान 43 बॉलांनी पांच चवके आनी आठ सक्यांचे मजतीन नाबाद 88 धांवड्यांची खेळी केली. ट्रिस्टन स्तब्सान सात बॉलांनी नाबाद 26 धांवड्यो केल्यो.
गुजरात टायटन्सा वतीन संदीप वॉरियरान तीन विकेटी घेतल्यो. नूर अहमदाक एक विकेट फावो जाली.
पंतान अखेरच्या ओव्हरींनी विस्फोटक बॅटींग केली. 18वे ओव्हरींत ताणें आपलो अर्द शेंकडो पुर्ण केलो. ताणें मोहित शर्माच्या बॉलाचेर सको मारलो. अंदूंच्या हंगामांतलो ताचो हो तिसरो अर्द शेंकडो थारलो, जाल्यार आयपीएलांतलो वट्ट 18वो अर्द शेंकडो थारलो.
19वी ओव्हर घालपाक आयिल्ल्या साई किशोरान 22 धांवड्यो दिल्यो. पंत आनी स्तब्स हे जोडयेन दोन चवके आनी दोन सके मारले. 19वे ओव्हरी उपरांत दिल्लीचो स्कोर 4 बाद 193 जालो.
निमाणे आनी 20वे ओव्हरींत मोहित शर्मान 31 धांवड्यो दिल्यो. पंतान चार सके आनी एक चवको मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
