भांगरभूंय | प्रतिनिधी
पणजी, बातमीदार ः दिल्ली पुलिसांच्या अर्थीक गुन्यांव फांट्यान आरोपपत्रा वरवीं एक धक्को दिवपी प्रकरण उजवाडाक हाडलां. दिल्लींतल्या एनबीएफसीची 4.11 कोटी रुपयांची फटवणूक करून गोंयांत पर्वरीत व्हड रेस्टॉरंट चलोवपी जोडप्याक दिल्ली पुलिसांनी अटक केल्या. सध्या हें जोडपें दिल्लींत न्यायालयीन बंदखणीत आसा. तांचे आड पुलिसांनी आरोपपत्र दाखल केलां. विकास शांडिल्य (48) आनी मीनाक्षी (43) अशी ह्या दुबावित जोडप्यांची नावां आसा.
नेमकें प्रकरण कितें?
विकास शांडिल्य आनी मीनाक्षी ह्या जोडप्यान दिल्ली विद्यापिठांतल्यान पदवी मेळयली आनी कांय काळ कपड्यांचो वेवसाय केलो. 2017 वर्सा गौरव शर्मा हांच्या संपर्कांत ते आयले. उपरांत ताणें एनबीएफसी (नॉन बँकिंग फायनान्शियल कंपनी) कंपनीची फटवणूक करपाचे थारयलें. हातूंत तांचे बरोबर अजून एक आनी विकासाचे आवयचोय आस्पाव आशिल्लो.
ह्या चार जाणांनी मेळून ‘ॲपेरेल्स’ नांवाची कंपनी सुरू केली. ही मालमत्ता विकासाच्या आवयची आशिल्ल्याचे दस्तावेज तयार केलो. पूण ही मालमत्ता ताचे आवयन पयलींच विकिल्ली. उपरांत कंपनीन एनबीएफसी कडेन 4.11 कोटी रिणा खातीर अर्ज केलो. ह्या अर्जाचेर सगल्यांनी खोटी सय करून बनावट कागदपत्रांय दाखल केली. बँकेन 31 ऑगस्ट 2017 दिसा हें रीण मंजूर केलें. पूण, कांय म्हयने हप्ते फारीक करूंक ना. ह्या प्रकाराक लागून एनबीएफसीन कंपनीच्या पत्त्याचेर अधिकारी धाडले. थंय पावतकच अधिकारी अजाप जाले, कारण थंय कंपनीच नाशिल्ली. तांचे उपरांत शर्मा आनी हेरां कडेन संपर्क करपाचो यत्न केलो पूण तेय शक्य जाले ना. ह्या चार जाणांनी कंपनीची फटवणूक केल्ल्याचे कळटकच कंपनीन रोखडीच दिल्ली पुलिशेंत कागाळ दाखल केली.
उपरांत दिल्ली पुलिसांनी देशभरांत तांचो तपास सुरु केल्लो. चार वर्सां दिल्ली पुलिसांचो अर्थीक गुन्यांव फांटो तांच्या सोदात आशिल्लो. पूण तें सांपडूक ना. ह्याच तपासांत विकास आनी मीनाक्षी गोंयांत आसात आनी ते ‘रसोई’ नांवाचें रेस्टॉरंट चलयतात अशें पुलिसांक कळ्ळें. उपरांत तांच्या चवकशी मजगतीं गोंयांतल्या जायत्या रेस्टॉरंटांच्या नांवांत ‘रसोई’ हें उतर आसा अशें दिसून आयलें. देखून ते खंयच्या ‘रसोई’ त आसा हें कळ्ळें ना. हाचे खातीर पुलिसांनी एक डावपेच आंखलो आनी निमाणें त्या दुबावीत जोडप्या कडेन पावले.
अर्थीक गुन्यांव फांट्यान सोद कारवाय करपा खातीर स वांगड्याचो पंगड गोंयांत धाडलो. हो पंगड उत्तर गोंयच्या एका हॉटेलांत रावलो आनी चवकशी करपाक सुरवात केली. ‘रसोई’ उतर आशिल्ल्या सगळ्या हॉटेलांचे संपर्क क्रमांक पुलिसांनी मेळयले. मागीर ऑनलायन फूड डिलिव्हरी अॅप्लिकेशन वापरिनासतना थेट संपर्क करुन जेवणाची ऑर्डर दिवपाक सुरवात केली. शाही पनीर, नान आनी डीलक्स जेवणाची ऑर्डर ते दियत रावले. धा दिसांत ताणी पांच व्हडल्यो फूड ऑर्डर दिल्यो. उपरांत ती ऑर्डर घेवन येवपी डिलिव्हरी बॉया फाटल्यान एक पुलीस वतालो. अशे तरेन पांचव्या ऑर्डरी वेळार पुलीस ‘आंटी की रसोई’ (Aunty ki Rasoi) रेस्टॉरंटात पावले. ते रावताले त्या हॉटेला पसून फकत 4 किमी अंतराचेर हें रेस्टॉरंट आशिल्लें. हांगाच तांकां विकास आनी मीनाक्षी मेळ्ळी. चार वर्सां सावन फरारी आशिल्ल्या ह्या जोडप्याक फाटल्या वर्सा ऑगस्टांत पर्वरींतल्यान अटक केल्ली. तेन्ना सावन ते न्यायालयीन बंदखणीत आसात. आतां ताचे विरोधात आरोपपत्र दाखल केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
