भांगरभूंय | प्रतिनिधी
-भारतान दुसऱ्या दिसा अखेर घेतली 157 धांवड्यांची आघाडी
-भारत आड ऑस्ट्रेलिया बायलां टॅस्ट मॅच
मुंबयः मुंबयंतल्या वानखेडे स्टेडियमाचेर भारत आनी ऑस्ट्रेलिया बायलां पंगडां मदीं टॅस्ट मॅच चालू आसा. ऑस्ट्रेलियन पंगडाक 219 धांवड्यांत गुठलायले उपरांत भारतीय पंगडाचो दुसऱ्या दिसाचो खेळ सोंपलो, तेन्ना पयल्या डावांत 157 धांवड्यांची आघाडी घेतल्या. दुसऱ्या दिसाचो खेळ सोंप मेरेन भारतान 7 विकेटी वगडावन 376 धांवड्यो केल्ल्यो. सध्या पूजा वस्त्राकर आनी दिप्ती शर्मा क्रिजीचेर आसात.
भारताचाे पयलो डाव-
शेफाली वर्मा 40 आनी स्मृती मंधाना 74 धांवड्यो करून बाद जाल्यो. उपरांत स्नेह राणाक 9 धांवड्यो करपाक जमले. ऑस्ट्रेलिये कडल्यान ऍशले गार्डनर आनी जेस जोनासेन हांणी दरेकी एक विकेट घेतली. उपरांत ऋचा घोष आनी जेमिमा हांणी चौथे विकेटी खातीर 113 धांवड्यांची भागिदारी केली. ही भागिदारी किम गर्थना तोडली. तिणें रिचाक बाद केले. रिचा 104 बॉलांनी 7 चवक्यांचे मजतीन 52 धांवड्यो करून बाद जाली.
त्याच वेळार जेमिमानूय अापलो अर्दशेंकडो पुराय केलो. तिणें 73 धांवड्यो केल्यो. मुखेली हरमनप्री कौर खातें उक्तें करिनासतनाय पॅव्हेलियनांत परतली. जाल्यार यास्तिका भाटियान फक्त एक धांवडी केली. उपरांत जेमिमाह रॉड्रिग्स हिणें 121 बॉलांनी 9 चवक्यांचे मजतीन 73 धांवड्यो करुन बाद जाली. तिका ऍशले गार्डनरान सदरलँडच्या हातांत कॅच दिवन आवट केली. उपरांत दिप्ती आनी पूजान परतून आठवे विकेटी खातीर 102 धांवड्यांची भागिदारी केली. दिप्ती 70 धांवड्यो करून आनी पूजा 33 धांवड्यो करून क्रिजचेर आसात.
ऑस्ट्रेलिया पयलो डाव-
अॉस्ट्रेलियेचो पयलो डाव 219 धांवड्यांचेर सोंपलो. बेथ मूनीन 40, ताहिला मॅकग्रान 50 आनी मुखेली अॅलिसा हिलीन 38 धांवड्यो केल्यो. तशेंच किम गर्थ 28 धांवड्यो करून नाबाद उरली. सदरलँड (16, जोनासेन (19) आनी लॉरेन चीटल (6) आनी अलाना किंग (5) धांवड्यो केले उपरांत बाद जाली. फोबी लिचफिल्डान खातेय उक्तें करूंक ना, जाल्यार एलीस पेरी चार धांवड्यो करून बाद जाली. भारता वतीन पूजा वस्त्राकारान चार विकेटी घेतल्यो, जाल्यार स्नेह राणान तीन विकेटी घेतल्यो. दिप्ती शर्मान दोन विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
