भांगरभूंय | प्रतिनिधी
माेटार चालकाक अटक
पणजीः मंगळारा मध्यान रातीं दोनपावला सर्कला लागसार वेगान वचपी बीएमडब्ल्यू एम 340 आय मोटारीन तीन मोटारींक नेटाचो धपको दिलो. ह्या अपघातांत तिनूय मोटारींचें व्हड प्रमाणांत लुकसाण जालां. पणजी पुलिसांनी ह्या प्रकरणांत कारवाय करून बीएमडब्ल्यू मोटार चालक जगदीश सरदेसायाक अटक केल्या.
पणजी पुलिसांनी दिल्ले म्हायती प्रमाण मंगळारा मध्यान रातीं दोनपावला सर्कला लागसार जाल्ल्या अपघाताची म्हायती नियंत्रण कक्षाक मेळ्ळी. ते प्रमाण नियंत्रण कक्षाची गाडी आनी पुलीस घडणुकेच्या सुवातेर पावले. त्या वेळार बीएमडब्ल्यू एम 340आय मोटारीन महिंद्रा ईव्ही, स्कोडा रॅपिड आनी महिंद्रा थार ह्या तीन गाडयांक धपको दिल्ल्याचें दिसून अायलें. पुलिसांनी घडणुकेचो पंचनामाे करून हेर गाडयो कुशीक काडून हेर गाडयो वचपाक रस्तो निवळ केलो.
पुलिसांनी ह्या प्रकरणाची चवकशी केली, तेन्ना बीएमडब्ल्यूचो ड्रायव्हर सोऱ्याचे घुंवळेंत मोटार घाळपणान चलयिल्ल्यान अपघात जाल्ल्याचें कळ्ळें. मजगतीं, अपघाता उपरांत उल्लेख केल्ल्या मोटार चालकान हेर मोटार चालकांचो गैरवापर करून गोंदळ निर्माण केलो. हे घडणुकेक लागून कांय वेळ दोनापावला वाठारांत तणावाचें वातावरण निर्माण जाल्लें. ते उपरांत पुलिसांनी बीएमडब्ल्यू कार चालक जगदीश सरदेसाय (27, दोनपावला) हाका ताब्यांत घेतलो.
मजगतीं, पुलिसांनी वाठारांतल्या सीसीटीव्हीची तपासणी करतना बीएमडब्ल्यू गाडयेचो ड्रायव्हर वेगान वता अशें दिसून आयलें. तशेंच अपघात जाल्ल्या सुवातेर पावतकच ताचें गाडये वयलें नियंत्रण सोडून रस्त्या कुशीक उबीं आशिल्ल्या दोन गाडयांक धपको दिलो. ते उपरांत फुडल्यान येवपी गाडयेक धपको दिवन तो थांबलो, अशें कळ्ळें.
ह्या अपघातांत बीएमडब्ल्यू गाडये वांगडा तीन गाडयांचें हातूंत ईव्ही, स्कोडा रॅपिड आनी महिंद्रा थार – व्हड लुकसाण जालें, पूण सुदैवान कोणाक दुखापत जावंक ना. फाटल्या दोन म्हयन्यांत दोनापावला घडिल्ली ही दुसरी व्हड घडणूक. ह्या प्रकरणांत पणजी पुलिसांनी मोटार चालक जगदीश सरदेसाय (27, दोनापावला) हांचे आड गुन्यांव नोंद करून ताका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
