दामोदर मावजो हांचो मंगळारा काणकोणां नागरी भोवमान

भांगरभूंय | प्रतिनिधी

सुवाळ्यांत डॉ. रुपा च्यारी हांच्या पुस्तकाचेंय विमोचन

काणकोण: ज्ञानपीठ पुरस्कार जैतिवंत साहित्यीक दामोदर मावजो हांचो 5 जुलय दिसा सकाळीं 10.30 वरांचेर माश्यां सत्यवती सोयरू आंगले उच्च माध्यमीक विद्यालयाच्या सभाघरांत काणकोणकारा वतीन नागरी भोवमान जातलो.

काणकोण कोंकणी कला केंद्रान ह्या कार्यावळीचें आयोजन केलां. ह्या सुवाळ्याक निवृत्त आयएएस अधिकारी दौलत हवालदार हे मुखेल सोयरे म्हूण हाजीर आसतले. कार्यावळींत गोंयच्यो नामनेच्यो सुत्रसंचालिका डॉ. रुपा च्यारी हांच्या ‘सुत्रसंचालन: अनुभव आणि आकलन’ ह्या मराठी पुस्तकाचो विमोचन सुवाळो दामोदर मावजो हांचे हस्तुकीं जातलो.

पुणेंच्या शारदा प्रकाशनान हें पुस्तक प्रकाशीत केलां. ह्या वेळार उल्हास पै भाटीकार मावजो हांच्या ‘रिजल्ट’ ह्या कथेचें सादरीकरण करतले.

काणकोण कोंकणी कला केंद्राचे संस्थापक वांगडी कमलाकार म्हाळशी हांचे अध्यक्षताये खाला काणकोण पॅलेसींत जाल्ले हे बसकेंत केंद्राचे सचीव व्यंकटराय नायक, रमेश कोमरपंत, उल्हास पै भाटीकार, डॉ. पूर्णानंद च्यारी, डॉ. रुपा च्यारी, चेतन आचार्य, अजीत पैंगीणकार, शिरीश पै, सुनील पैंगीणकार, प्रसाद पागी, सुदेश नायक हांणी विवीध विशयाचेर चर्चा केली. केंद्राचे अध्यक्ष सूरज कोमरपंत हांणी उपकार मानले.