भांगरभूंय | प्रतिनिधी
वास्को, प्रतिनिधी: दाबोळे विमानतळा वेल्यान बुधवारा सकाळीं मुंबयक वचपाचें आशिल्ल्या एअर इंडियाच्या विमानाक उबे आशिल्ले कडेन सवणें येवन आदळिल्ल्यान उड्डाण रद्द केलें. विमानाच्या दाव्या इंजिनांतल्यान धुंवर आयिल्ल्यान तें इबाडलें. ह्या विमानांत ११६ प्रवाशी आशिल्ले. ही घडणूक गंभीर आशिल्ल्यान हे विशीं नौदळाक कळयतले, अशें दाबोळी विमानतळ अधिकाऱ्यान स्पश्ट केलें.
पयलींय अश्यो विमानाक सवणीं येवन आपटिल्ल्याच्यो घडणुको घडल्यात. तेन्ना आशिकुशीकच्या वाठारांतल्या कोयराचो प्रस्न मुखार सरिल्लो. आयज जाल्ले घडणुकेंत परत कोयराचो प्रस्न तोंड वयर काडपाची शक्यताय आसा.
दाबोळी विमानतळा वेल्यान मुंबय वचपा खातीर सकाळीं ६.५५ च्या मजगतीं विमान धांपपट्टीचेर उबें आशिल्लें. तेन्ना अचकीत एक सुवणें येवन विमानाक आपटलें. ताका लागून इंजिनांतल्यान धुंवर येवपाक लागलो. प्रवाशांक देंवयल्या उपरांत विमान पार्कींगाचे सुवातेर व्हेले. ह्या विमानांतल्या तंत्रिकी इबाडा विशीं तंत्रज्ञ तपास करतात.
विमानतळाच्या भोंवतणच्या वाठारांनी कोयर आसतालो. ताका लागून कोयरांतलें खाण खावपाक सवणीं येतालीं. हे विशीं ग्रामपंचायती आनी भारतीय नौदळ, विमानतळ अधिकाऱ्यांच्यो बसका जावन कोयरा प्रस्नाचेर कितेंय उपाय काडपा विशीं पावलां उबारलीं. उपरांत सवणीं विमानांक आदळपाच्यो घडणुको उण्यो जाल्ल्यो. आयज परत ह्या कोयराच्या प्रस्नान तोंड वयर काडलां.
कोयराचो योग्य तरेन विलो लावपाचो यत्न पंचायती करता. दारा-दारांतलो कोयर उखलपाचें कंत्राट दिलां. ताका लागून रस्त्याचेर कोयर उडोवप उणें जालां. तरीय कांय लोक कोयर उडयतात. हातूंत सुशिक्षीतांचोय आसपाव आसा. असल्या गजालींचेर बंदी घालपाची गरज आसा, अशें एका प्रवाशान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
