भांगरभूंय | प्रतिनिधी
पणजी: देशांतली चौथ्या क्रमांकाची भोवराज्य नागरी सहकारी बँक आशिल्ल्या टीजेएसबी सहकारी बँक लिमेटडान काल (बिरेस्तारा) दाबोळे नव्या फांट्याचें उक्तावण केलें. गिरायकांक अदीक सुलभ, आधुनीक आनी तंत्रज्ञानाचेर आदारीत बँकींग सुविधा उपलब्ध करून दिवपाच्या वचनबद्दतायेचो हें आनीक एक म्हत्वाचें पावल आसा.
ह्या उक्तावण सुवाळ्यांत उद्देजक नारायण बांदेकार, सीए राजेंद्र भोबे, टीजेएसबी बँकेचे अध्यक्ष शरद गांगल, गोंय, कर्नाटक विभाग मुखेली अरूण भट, बँकेचे वरिश्ठ अधिकारी, मानेस्त गिरायक, थळावे उद्देजक, वेवसायीक तशेंच बरें मागपी हाजीर आशिल्ले.
ह्या वेळार उलयतना बँकेचे अध्यक्ष शरद गांगल हांणी सांगलें, गिरायकांचो विस्वास, उत्कृश्ट सेवा आनी तंत्रज्ञानाचेर आदारीत बँकींग सुविधा ह्याच बळार टीजेएसबी बँक सेगीत उदरगत करीत आसा. दाबोळे फांट्याच्या माध्यमांतल्यान गोंयांतल्या गिरायकांक सक्षम, सुरक्षीत आनी दर्जेदार बँकींग सेवा उपलब्ध करून दिवपाक आमी वचनबद्ध आसात.
थळावे नागरीक, वेवसायीक आनी उद्देजकांच्या अर्थीक उदरगतींत योगदान दिवप हो आमचो मुखेल उद्देश आसा. दाबोळी फांट्याक लागून वाठारांतल्या गिरायकांक बचत आनी चालू खातीं, मुजत ठेवी, घरा खातीर रीण, भांगर दवरून रीण, वेवसायीक रीण, एमएसएमई वित्त पुरवण, फॉरेक्स सेवा तशेंच अत्याधुनीक डिजिटल बँकींग लाव अदीक सुलभतायेन घेवंक मेळटलो अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
