भांगरभूंय | प्रतिनिधी
वास्को, प्रतिनिधी: राज्य सरकारान सगळ्यांत पयलीं दाबोळे आंतरराष्ट्रीय विमानतळ कार्यरत उरतलो हाचें स्पश्टीकरण जनतेक दिवप गरजेचें. कारण राज्य भाजप सरकाराचेर जीएमआर कंपनी चेंपण हाडटा आनी दाबोळे विमानतळा वयलीं सगळीं चार्टर्ड विमानां मोपाचेर वळयता, असो आरोप गोंय प्रदेश कॉंग्रेस समितीचे फुडारी कॅप्टन व्हिरियातो फर्नांडीस हांणी केलो.
जून म्हयन्या सावन दाबोळी विमानतळा वयलीं कतार एअरवेज विमान सेवा मोपा विमानतळार देंवतली. ती आपली सेवा मोपाच्यानूच दितली अशें जाहीरूय केलां. ताका लागून फुडाराक दाबोळी विमानतळार चार्टड विमानां येवपाचीं बंद जातलीं, हें मात खरें अशें कॉंग्रेस फुडारी फर्नांडीस हांणी सांगलें. दाबोळी विमानतळा वयलीं चार्टड विमानां पेडणें मोपा विमानतळार गेल्यार, मुरगांव म्हाला वांगडा पुराय दक्षीण गोंयच्या वेवसायाक अर्थीक फटको बसतलो अशें कॅ. फर्नांडीस हांणी सांगलें. कारण पेडणें मोपा विमानतळा वटेन गिरेस्तांनी व्हडा प्रमाणांत जागे विकते घेतल्यात. थंय फायव्ह स्टार हॉटेलां उबारून कॅसिनो हब निर्माण करून मोपा विमानतळार येवपी प्रवाशांक आकर्शीत करपाचो हेत आसा, असो दावो तांणी केलो.
दाबोळी विमानतळार नौदळ आशिल्ल्यान आयज मेरेन हो विमानतळ कार्यरत आसा. नाजाल्यार जीएमआर कंपनीन दाबोळी विमानतळार येवपी सगळीं विमानां मोपा विमानतळार हालयल्यांत. दाबोळी विमानतळा वयल्यान भांगराची तस्करी जाता, असो दावो करून कॅ. फर्नांडीस हांणी ताचो तपास करपाची मागणी केली.
देशांत जावपी लोकसभा वेंचणुकेंत कॉंग्रेस पक्ष व्हडा प्रमाणांत जैतिवंत जातलो.गोंयांत दक्षीणे सयत उत्तरेंतूय कॉंग्रेस पक्ष खूब मतां घेवन जैतिवंत जातलो. अखिल भारतीय कॉंग्रेस समिती जो उमेदवार दक्षिणेंत जाहीर करतली ताचे फाटल्यान कॉंग्रेस कार्यकर्ते प्रामाणिकपणान काम करतले अशेंय कॅ. व्हिरियातो फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
