भांगरभूंय | प्रतिनिधी
वास्को: दाबोळे रेल्वे पुलार बिरेस्तारा सांजवेळा सात वरांचेर जाल्ल्या अपघातांत नवे वाडेंचो शौकत अली (60) हांकां मरण आयलें. ह्या प्रकरणांत वास्को पुलिसंनी पंचनामो करून ट्रक चालका आड गुन्यांव नोंद केला.
शौकत अली हे आपले दुचाकीन नवें वाडें सावन वेर्ण्यां वटेन वताले. ते दोबोळे रेल्वे पुलार पावले तेन्ना वेर्ण्यां वटेन वचपी ट्रकाच्या फाटल्या रोदांत सांपडले. ट्रकाच्या धपक्यान ते ट्रकाच्या रोदा पोंदा सांपडले काय तांच्या दुचाकीचो ट्रकाक फाटल्यान धपको बसून ते रोदा पोंदा सांपडले हें अजून स्पश्ट जाल्लें ना.
ट्रकाच्या फाटल्या रोदांत कोणतरी सांपडला हें लक्षांत आयले बरोबर ट्रक चालकान ट्रक थांबयलो. रोदा पोंदा आशिल्ले शौकत अली गंभीर जखमी जाल्ल्यान तांकां रोखडेंच चिखली उपजिल्हो हॉस्पिटलांत दाखल केले. पूण थंय उपचार सुरू आसतना तांकां मरण आयलें. वास्को पुलिसांनी गुन्यांव दाखल केला आनी फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
