दाबोळी- बोगमाळो चौकांतले डेलिनिएटर जातात गायब

दाबोळी- बोगमाळो चौकांतल्या डेलिनिएटरांतले कांय बागयिल्ले डिलिनिएटर. (अक्षंदा राणे)

भांगरभूंय | प्रतिनिधी

कायमस्वरुपी वेवस्था उबारपाची लोकांची मागणी

भांगरभूंय । प्रतिनिधी

वास्कोः दाबोळी- बोगमाळो चौकांत येरादारी नियंत्रणा खातीर येरादारी पुलिसांनी रस्त्याचेर लायिल्ले डेलिनिएटर (बार बॅरियर्स) कांय जाण मोडपाक लागिल्ल्याचें दिसून आयलां. हे डेलिनिएटर सहजतायेन बागोवपाक, मोडपाक वा कोंचून काडपाक मेळटात. ताका लागून थंय सिमेंटाच्यो लादयो लावपाची गरज आसा, अशें लोकांचें म्हणणें आसा.

दाबोळी- बोगमाळो चौकांत येरादारी सिग्नल बसयलां. झुआरीनगराच्यान विमानतळ मार्गाचेर वचपी कांय जाण तांबडें सिग्नल पडून लेगीत थंय रावनात. ते दावे वटेन बोगमाळो रस्त्याचेर वतात अशें दाखोवन कांय अंतराचेर वचून वोल्त मारून येतात आनी दाबोळी मार्गान वतात. ताका लागून थंय अपघात जावपाची शक्यताय आशिल्ली. तशेंच चौकांतल्या ह्या रस्त्याचेर नो पार्कींग आसून लेगीत मोटारी आनी हेर गाडयो थंय लोक उबीं करतले. ताका लागून थंय सदांच बाकीच्या गाडयांक आडखळ जाताली. ह्या प्रकाराचेर आवाज काडले उपरांत येरादारी पुलिसांनी थंय येरादारी वेवस्था सुदरावचे खातीर कांय पावलां उखलिल्लीं.

बोगमाळो वचपी रस्त्याचेर भौशीक बांदकाम खात्यान खूब अंतरा मेरेन डेलिनिएटर लायल्यात. ताका लागून सिग्नल पडले परांत बोगमाळो रस्त्यान वतात अशें दाखोवन कांय अंतराचेर वचून वोल्त मारून येवपी तशेंच थंय गाडयो पार्क करप्यांची धांदल जाल्ली. नेम मोडपाची संवय जाल्ल्यांनी थंयचे डेलिनिएटर मोडपाक सुरवात केल्या, असो दुबाव आसा. सुमार देड म्हयन्यां आदीं थंय लायिल्ल्या डेलिनिएटरांतले कांय डेलिनिएटर गायब जाल्यात, जाल्यार कांय बागयल्यात. अशें केल्ल्यान दुचाकी चालकांक मदल्यान वाट काडप सोपें जालां. ल्हवू ल्हवू थंयचे चडशें डेलिनिएटर थंयच्यान गायब जावपाची शक्यताय निर्माण जाल्या. ताका लागून थंय सहजतायेन काडपाक मेळनात अशी कायमस्वरुपी वेवस्था उबारपाची गरज लोकांनी उक्तायल्या.