भांगरभूंय | प्रतिनिधी
दक्षीणेंत दादल्यां परस 18359 महिला मतदार चड
पणजी, प्रतिनिधी : अंदुं उत्तर तशेच दक्षीण ह्या गोंयांतल्या दोनूय मतदारसंघांत दादल्या परस महिला मतदारांचो आंकडो चड आसा. दक्षीण गोंयांत भारतीय जनता पक्षान महिला उमेदवाराचो सोद सुरू करपाचे फाटभुंयेर ही गजाल महत्वाची थारता.
दक्षीण गोंयांत महिला मतदारांचो आंकडो 3 लाख 4 हजार 757 आसा. दादल्या मतदारांचो 2 लाख 86 हजार 398 आसा. दादल्यां परस महिला मतदारांचो आंकडो 18 हजार 359 नी चड आसा. हो आंकडो दुर्लक्ष करपा इतलो उणो ना. दक्षीण गोंय मतदारसंघांत उमेदवारी खातीर नांवांची शिफारस केल्या उपरांत केंद्रीय फुड्याऱ्यांचे सुचोवणेक लागुन पक्षान महिला उमेदवार सोदपाची प्रक्रीया सुरू केल्या.
उत्तर गोंयांत सुद्दा दादल्या परस महिला मतदारांचो आंकडो चड आसा. उत्तरेत दादले मतदार 2 लाख 79 हजार 230 आसा जाल्यार महिला मतदार 2 लाख 96 हजार 543 आसा. महिला मतदारांचो आंकडो दादल्या मतदारां परस 17 हजार 313 नी चड आसा.
राज्यात दादल्या मतदारां परस महिला मतदारांचो आंकडो 35 हजार 672 न चड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
