भांगरभूंय | प्रतिनिधी
नवी दिल्ली, खबरां संस्था ः हालींच्या काळांत बायलां मदीं सोरो आनी धूम्रपानाचे वेसन वाडत आसा. खास करून शारांनी रावपी बायलां मदीं. सोरो, चिकना वांगडा विकेंड मनोवपी बायलांचो आंकडो वाडला. सिगरेट आनी सोऱ्याच्या वेसनाक लागून बायलांक गर्भाशयाच्या कॅन्सराची चड शक्यताय आसता. तशेंच हाका लागून कुडीची रोगप्रतिकार शक्तय उणी जाता. मजगतीं, केंटकी विद्यापिठान हलींच केल्ल्या एका अभ्यासातल्यान दादल्यां परस बायलो चड धूम्रपान करतात ही धक्को दिवपी गजाल उजवाडाक आयला.
धूम्रपान हें संवसारभरातल्या घातक दुयेंसांचें मुखेल कारण. यूएस सेंटर्स फॉर डिसीज कंट्रोल अँड प्रिव्हेंशन प्रमाण फकत अमेरिकेंत दर वर्सा 4.8 लाखां परस चड लोकांक धूम्रपानाक लागून मरण येता. 2021 मेरेन सुमार 11% अमेरिकन लोकांक सिगरेटाचें व्यसन जालां. तातूंत दादल्यांचें प्रमाण चड आशिल्ले. पूण दादल्यां परस बायलां बेगीन व्यसनी जावपाची शक्यताय आसता आनी व्यसना पसून सुटका मेळोवप कठीण जाता अशें अभ्यासांतल्यान दिसून आयलां. चड धूम्रपानाक लागून बायलांमदीं लठ्ठपणा वाडटा. बायलां मदीं लठ्ठपणाचें प्रमाण 27 टक्के आसा, जाल्यार 25 टक्के दादल्यां मदीं आसा.
धूम्रपान सोडपाचें प्रमाण दादल्यां मदीं चड
धूम्रपान सोडप बायलां परस दादल्यांक सोंपें, पूण बायलांक ही संवय सोडप कठीण जाता. लठ्ठपणा आनी सिगरेटांतले कांय घटकांक लागून बायलांक धूम्रपान सोडप कठीण जाता. सेगीत 28 दीस धूम्रपान करिनासतना व्यक्तींनी कार्बन मोनोऑक्साईडची पातळी 10 (पीपीएम)न मेजतात. देखून दादल्यां मदीं निकोटीनाची पातळी चड आसून लेगीत बायलांक सिगरेट सोडप चड कठीण जाता अशें दिसून आयला. ह्या अहवाला प्रमाण हाचें कारण म्हळ्यार बायलां मदीं मानसीक अस्वस्थताय आनी मोटसाण.
गुरवारपणांत धूम्रपान केल्यार कितें दुश्परिणाम जातात?
गर्भपात, गर्भात व्यंग आसप, गर्भाची वाड जावपाक आडखळ येवप, मुजती पयली डिलीव्हरी, सेगीत दुयेंत पडप, काम करपाची तांक उणी जावप, रगतदाब, काळजाचे दुयेंस, टायप 2 गोडेंमूत, कॅन्सर, हाडां दुबळी जावप, व्यसन आनी चुकीच्यो संवयीं आमचें व्यक्तिमत्व दुबळें करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
