भांगरभूंय | प्रतिनिधी
संवसारांतल्या पयल्या दांत तयार करपी वखदाची मनशाचेर चांचणी कांय म्हयन्यांनी सुरू जातली. सद्या ताची जनावरांचेर येसस्वी चांचणी जाल्या. वखदाची येसस्वी चांचणी केल्या उपरांत २०३० मेरेन हे वखद बाजारांत विक्री खातीर उपलब्ध जावंक शकता.
सप्टेंबर ते ऑगस्ट २०२५ मेरेन क्योटो विद्यापिठाच्या हॉस्पिटलांत ही चांचणी जातली. जातूंत ३० -६४ वर्सां पिरायेचे ३० दादले आसतले. उण्यांत उणो एक दांत नाशिल्ल्या लोकांचेर ही चांचणी सुरू आसा. शिरांनी उपचारांचें परीक्षण ह्यूमन ट्रायलांत पळोवपाक मेळटलें. कारण ह्या वखदाक लागून फेरेट आनी मावस मॉडेलांत नवे दांत येसस्वीपणान वाडयल्यात आनी ताचे कसलेच म्हत्वाचे अशे दुश्परिणाम जावंक ना.
मनशाची चांचणी केल्या उपरांत २ ते ७ वर्सां पिरायेच्या भुरग्यांचेर परिक्षण
११ म्हयन्यांच्या ह्या पयल्या टप्प्या उपरांत संशोधक २-७ वर्सां पिरायेच्या दुयेंतींचेर ह्या वखदाची चांचणी करतले. जांकां जल्माक सावन दांत ना वा कांय कारणांक लागून दांत पडल्यात अश्या भुरग्यांचेर ही चांचणी जातली. आतां संशोधक पर्यावरणीय घटकांक लागून एक ते पांच दांत नाशिल्ल्या लोकां मेरेन ही चांचणी वाडोवपाचो यत्न करतात.
वेगवेगळ्या कारणांक लागून दांत गळून पडपी जायते लोक आसात. अशा लोकां खातीर हें वखद खूब प्रभावी थारूंक शकता. दांत नाशिल्ल्यान जेवप, पिवप आनी उलोवपाक त्रास सोंसपी लोकांच्या तोंडार परतून हांसो हाडपाक शकता.
अशें वखद काम करतलें
हें वखद गर्भाशयाची संवेदनशीलताय संबंदीत जीन-१ (USAG-1) प्रथिन निश्क्रीय करता, जें दांतांची वाड दामून दवरता. आदल्या संशोधनांतल्यान अशें दिसून आयलां की USAG-1 हेर प्रथिनांकडेन जावपी परस्पर क्रिया आडायल्यार मॉर्फोजेनेटिक प्रोटीन (BMP) सिग्नलिंगाक उत्तेजीत जाता आनी ताका लागून नव्या हाडांची निर्मिती सुरू जाता. ह्या वखदाची उंदीर आनी फेरेट हांचेर चांचणी केल्या. जातूंत येसस्वी परिणाम मेळ्ळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
