भांगरभूंय | प्रतिनिधी
मडगांव, प्रतिनिधी : दवर्ली पॉवर हावजा लागसारा आशिल्ले इमारतीचे फाटले वटेनच्या व्हाळाचे राखणे वणटीचें काम करतना वेर्णें उद्देगीक वसणुकेक उदक सोडपी पायप फुटलें. ताका लागून लाखांनी लिटर उदकाची वाट लागल्या. उदका स्रोत खातें हें पायप दुरुस्त करता. हें पायप फुटिल्ल्यान घरांतल्या उदका पुरवणेचेर परिणाम जावचो ना, अशें अभियंत्यांनी स्पश्ट केलां.
दवर्ली उदका स्रोत खात्या वरवीं व्हाळाची राखणे वणट बांदपाक खणपाचें आनी फातर उडोवपाचें काम चालू आसा. शुक्रारा सकाळीं जेसीबी खणपाचें काम करतना ७०० मिमी उदकाचें पायप फुटलें. ताका लागून उदक व्हांवून गेलें. अधिकार्यांनी हांगा येवन पळोवणी केली आनी दुरुस्तीच्या कामाक सुरवात केल्या, अशें सांगलें.
जें ७०० मिमी उदकाचें पायप फुटलां, तें उदका स्रोत खात्याचे अखत्यारींत येता. ह्या पायपांतल्यान दवर्लेच्यान वेर्णें उद्देगीक वसणुकेक कच्च्या उदकाची पुरवण करता. ताका लागून घरगुती उदक पुरवणेचेर परिणाम जावंचो ना अशें तांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
