भांगरभूंय | प्रतिनिधी
मडगांव, प्रतिनिधी ः दवर्ली दिकरपालचें सरपंच संतोष नायक आनी उपसरपंच कार्मिनो कार्व्हालो हांचे आड अविस्वास थाराव संमत जाले उपरांत आमदार तुयेकार हांणी ही पंचायती तिगोवन दवरपाचें आव्हान स्विकारले. पांच समर्थक आसून लेगीत 6 आड 5 मतांच्या फरकान साईश राजाध्यक्ष सरपंच आनी विद्याधर आर्लेकार उपसरपंच पदाचेर जैतिवंत जाले.
जून म्हयन्यांत दवर्ली दिकरपाल पंचायतींत अविस्वास थाराव दाखल केल्लो आनी भाजपाची सत्ता वतली अशें दिसतालें, पूण तें घडलें ना. 2023 च्या नोव्हेंबरांत तेन्नाचे सरपंच हर्क्युलानो निस्साओ आनी मिशेल मिरांडा हांचे आड स पंचायतींनी अविस्वास थाराव संमत करून संतोष नायक हांकां सरपंच म्हणून वेंचून काडलो.
दवर्ली दिकरपाल ह्या 11 वांगड्यांची पंचायतींत 6 आड 5 अशा फरकान भाजपा समर्थकांनी जैत मेळयलें. विरोधी गटांतले मेनिनो कुलासो, मिशेल मिरांडा, मायला रोचा, फ्रान्सिस्को डायस, विधी वरक व हर्क्युलानो निआस्सो ह्या स पंचांच्यो सय हाचे आदीं अविस्वास थारावाचेर आशिल्ल्यो. आतां जाल्ले सरपंच वेंचणुकेंत साईश राजाध्यक्ष आनी उपसरपंच वेंचणुकेंत आर्लेकार हांकां दरेकीं स मतां मेळ्ळीं. विरोधी पंचांतल्या एका पंचांन क्रॉस वोटींग केलें. ह्या पंचायतींच्या राजकारणांत सत्ता तिगोवन दवरपाक भाजपान आनी आमदार उल्हास तुयेकार येसस्वी जाले.
भाजपांत सगल्या कार्यकर्त्यांक समान संद दितात अशें सरपंच राजाध्यक्ष हांणी सांगलें. सरपंच म्हूण कोयराची समस्या सोडोवपाक वावुरतलो. आदले सरपंच नायक हांचे वेळाची प्रलंबीत कामां मुखार चालू उरतली. तशेंच दवर्ली पंचायतीचो वाठार निवळ, सोबीत आनी सुरक्षीत जातलो अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
