भांगरभूंय | प्रतिनिधी
मडगांव, प्रतिनिधी ः फाटल्या कांय दिसांनी बुडपाच्या प्रकरणांत बरीच वाड जाल्या. देखून संबंदीत अधिकाऱ्यांनी न्हंय, घसघशे, तळयो, चिऱ्यां खणींचेर पेंवपाक वचपाचेर बंदी घाल्ली. तरी लेगीत कांय जाण अश्या सुवातींनी न्हावपाक वचून आपलो जीव धोक्यांत घालतात. वार्का दर्यावेळेर उदकांत बसून सोरो पियेवपी नीरज पवार (25, सां जुझे द आरियल) हो तरणाटो ल्हारां सयत व्हांवून गेलो आनी ताका बुडून मरण आयले. ही घडणूक आयतारा रातीं वार्का दर्यावेळेर घडली.
पुलिसां कडल्यान मेळिल्ले म्हायती प्रमाण, सां जुझे द आरियल वाठारांतलो नीरज नारायण पवार हो तरणाटो आयतारा वार्का दर्यावेळेर गेल्लो. दर्यादेगेर पावचे पयलींच नीरज पिल्लो आशिल्लो. दर्यादेगेर पावतकच तो आनीक पियेलो. ते उपरांत तो उदकांत बसून सोरो पियेवपाक दर्यांत गेलो.
मजगतीं भरतीच्या वेळार उदकांत बुडून ताका मरण आयलें. कांय वेळा उपरांत ताची कुड दर्यादेगेर व्हावून आयली. कोलवा पुलिसांनी हे घडणुकेची चवकशी केली तेन्ना नीरजाच्या मरणाचें कारण स्पश्ट जालें. पुलिसांनी हे प्रकरण असैमीक मरण म्हणून नोंद केला. कुड पोस्टमार्टमा खातीर दक्षीण गोंय जिल्लो हॉस्पिटलांत धाडल्या. कोलवा पुलीस निरिक्षक पडवळकार हांच्या फुडारपणा खाला उपनिरिक्षक वैभव शिरोडकार हे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
