भांगरभूंय | प्रतिनिधी
पणजी, प्रतिनिधी: शॅकांनी पर्यटकांक मारपेट आनी दर्यादेगेवेल्या वाठारांनी कायदो आनी सुवेवस्था कोसळप सांबाळपा खातीर सरकारान रातची पुलिसांची गस्त वाडोवपाचो निर्णय घेतला. दर्यादेगेवेल्या पुलीस स्टेशनांतले ४० टक्के पुलीस रातच्या वेळार गस्त घालतले. २० टक्के पुलीस हेर वाठारांनी गस्त घालपा खातीर आसतले अशें मुख्यमंत्री डॉ. प्रमोद सावंत हांणी सांगलें.
दर्यादेगेवेल्या वाठारांतल्या शॅकांनी आनी क्लबांनी जाल्ल्या झगड्याच्या प्रकरणांतल्या दुबावितांक अटक केल्या. अशे तरेचीं मारपेटाचीं प्रकरणां सरकार सोंसून घेवचें ना. गुन्यांवकारांचेर कारवाय जातली. चोरयांक आळो घालपा सयत कायदो आनी सुवेवस्था तिगोवन दवरपाचे सरकाराचे यत्न चालूच आसात. हाचो एक वांटो म्हूण रातची गस्त वाडयल्या. २० टक्के पुलीस नायट पॅट्रोलींगाचे ड्युटीचेर आसतले. दर्यादेग वाठारांतल्या पुलीस स्टेशनांतले ४० टक्के पुलीस नायट पॅट्रोलींगाचे ड्युटीचेर आसतले, अशें मुख्यमंत्र्यांनी म्हणलें.
रातच्या १० उपरांतचें संगीत सोंसचे ना
रातच्या १० उपरांतचें लावडस्पीकर वा व्हडा आवाजांतलें संगीत सोंसचे नात. रातचें व्हडल्यान संगीत वाजोवप्यांचेर नेमां प्रमाण कारवाय जातली. दर्यादेग वाठारांत कायदो सुवेवस्था राखपा सयत शांतिकाय इबाडप्यांचेरूय कारवाय जातली अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
