भांगरभूंय | प्रतिनिधी
लक्षवेधी सुचोवणेचेर मुख्यमंत्र्यांचें सभाघरांत आस्वासन
पणजी : दर्यादेग वाठारांतलीं नुस्तेमाऱ्यांचीं घरां तशेच पारंपरीक वेवसाय वाटावपा खातीर सरकार केंद्र सरकारा कडेन चर्चा करतलें. हो विशय न्यायालयात आसा, अशें मुख्यमंत्री डॉ. प्रमोद सावंत हांणी सांगलें.
दर्यादेग वाठारांतल्या वेवसायीक आस्थापनाक नोटीसो आयिल्ल्यान भिरांतीचे वातावरण आसा, अशी लक्षवेधी सुचोवणी आमदार मायकल लोबो हांणी सभाघरांत मांडली. हाचेर सभाघरांत बरोच वेळ चर्चा जाली. बांदकामां वाटोवपा खातीर मुख्यमंत्री सावंत केंद्रीय पर्यावरण मंत्र्यांची भेट घेवन चर्चा करपाचे आसा. केंद्रीय पर्यावरण मंत्र्यां कडेन तांणी भेट मागल्या, अशी म्हायती पर्यावरण मंत्री आलेक्स सिक्वेरा हांणी दिली.
नोटीसो वेवसायीक आस्थापनाक जारी जाल्या. नुस्तेमाऱ्यांच्या पारंपरीक घरांक नोटिसो जारी जावंक नात. नुस्तेमाऱ्यांची जी घरां १९९१ पयलीची आसा, तांका कसलोच धोको ना. दर्यादेग बांदकामांचे सर्वेक्षण ड्रोन पद्दतीन जावचें ना. हे विशीं सरकारान निर्णय घेवंक ना, अशेंय मंत्री सिक्वेरा हांणी सांगलें. विजय सरदेसाय, डिलायला लोबो, वेंझी व्हिएगस, जीत आरोलकार, संकल्प आमोणकार, अलेक्स रेजिनाल्ड, कार्लोस फेरेरा हे सगळे जाण लक्षवेधी सुचोवणेचेर उलयले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
