भांगरभूंय | प्रतिनिधी
पर्यटन मंत्री रोहन खंवटे हांची म्हायती
पणजीः गोंयच्या दर्यादेगेवेल्या कोयर, टावट्स आनी हेर बेकायदेशीर गजालींचेर पाळत दवरपा खातीर फुडल्या पर्यटन हंगामांत ड्रोन यंत्रणां चालीक लायतले. हीं यंत्रणां अस्तित्वांत आशिल्ले गोवा बीच व्हिजील ॲपाक जोडटले. हे यंत्रणेक लागून नेमाचें योग्य पालन सुनिश्चीत जातलें, अशी घोशणा पर्यटन मंत्री रोहन खंवटे हांणी केली.
गोंयच्या विवीध शॅक धनी संघटनांनी पर्यटन भवन पणजे हांगा पर्यटन मंत्री रोहन खंवटे आनी पर्यटन खात्याचे संचालक केदार नायक हांची भेट घेवन विवीध विशयांचेर चर्चा केली. भेटी उपरांतची म्हायती दितना खंवटे उलयताले.
गोंयच्या दर्यादेगेर कोयर, विक्रेकार आनी टावट्साचो विशय येत आसा. देखून ह्या वर्सा आमी ड्रोन यंत्रणां कार्यन्वीत करपाचो प्रस्ताव दवरला, अशें खंवटे हांणी सागलें.
सद्या खात्या कडेन बीच व्हिजील ॲप अस्तित्वांत आसा. ह्या ॲपा वरवीं फोटो धाडून बेकायदेशीर गजाली नोंद करपाक मेळटात. मात ह्या वर्सा ह्या ॲपाक ड्रोन सर्वेलन्स यंत्रणेची जोड दिवन दर्यादेगेर कोयर वा टावट्साचेर नदर दवरप तशेंच अतिक्रमण आनी हेर बेकायदेशीर गजालीचेंर कारवाय करून पर्यटकांक येवपी आडमेळीं पयस करपा खातीर हीं यंत्रणां आमी सुनिश्चीत करतले, अशी म्हायती खंवटे हांणी दिली.
दर्यादेगेर सुरक्षा, नितळसाण आनी हेर गजाली जाग्यार घालपा खातीर ड्रोन यंत्रणेची अंमलबजावणी उत्तर ते दक्षीण गोंयच्या दर्यादेगांनी करतले. ड्रोन सर्वेलन्स यंत्रणां बीच व्हिजील ऍपाक जोडटले. बीच व्हिजील ॲप ड्रोनांतलो सगळो डेटा एकठांय करतले आनी संबंदीत अधिकार्याक कारवाय करपाचो निर्देश करतले. जर दर्यादेगेर कोयर आसलो जाल्यार नितळसाण कंत्राटदाराक आनी टावट्स दिसल्यार पुलिसांक हांची म्हायती पावतली, अशें खंवटे हांणी सांगलें.
शॅक वेवसायांत एक वर्साची मुजतवाडः खंवटे
अस्तित्वांत आशिल्ले शॅक धोरणा खाला दर्यादेगेवेल्या शॅकांक तीन वर्सां खातीर दिल्ले लीज अंदूचें वर्स सोपता. मात शॅक धनयांची मागणी लक्षांत घेवन नवें धोरण चालीक लायनासतना अस्तित्वांत आशिल्ल्या धोरणा खाला एक वर्साची मुजतवाड पर्यटन खात्यान दिवपाचो निर्णय घेतला अशें पर्यटन मंत्री रोहन खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
