भांगरभूंय | प्रतिनिधी
मडगांव, प्रतिनिधी : राज्यांत रकपी घोग्यांनी पावसाक लागून भरते वेळार दर्याच्या उदकाचे पातळेंत वाड जाल्या. हाचो फटको दर्यदेगे लागसारा उबारिल्ल्या शॅकांक बसला. शॅकांनी उदक गेल्ल्यान शॅक धनयांक बरेंच लुकसाण जालां.
राज्यांत पर्यटन हंगामाक सुरवात जाता. अंदूं पर्यटन खात्यान हंगामा पयलींच शॅक उबारपाचे परवाने दिले. ताका लागून दर्यादेग वाठारांतल्या शॅक धनयांक वेळार कामाक सुरवात करपाक मेळ्ळी. मान्सून जरी देशांतल्यान परत वता तरी आग्नेय दिके वटच्या येवपी वार्याक लागून पावसाचें प्रमाण वाडलां. हवामान खात्यान येलो अलर्ट दिल्ल्यान नागरीकूय सादूर जाल्यात.
बुधवारा सांजवेळा सावन राज्यांत उटंगराचो पावस रकलो. पुनव आशिल्ल्यान दर्याक भरती आयिल्ली. तातूंतच पावसाचें वाडिल्ल्या प्रमाणाक लागून दर्याच्या उदकाची पातळी वाडल्या. बुधवारा मध्यान राती बाणावले, माजोड्ड्यां, उत्तोर्डा, सेर्नाभाटी दयारदेग वाठारांत उदक अचकीत वाडलें. हाका लागून दर्यादेगेर उबारिल्ल्या शॅक्सांनी तें घुसलें. शॅकांनी उदक घुशिल्ल्यान खाट, कदेलांचें आनी हेर सामानाचें लुकसाण जालें. कांय कडलीं शॅकां सकयल पडलीं. पावसाचे फटभूंयेर सगळे सादूर राविल्ल्यान व्हड लुकसाण जावंक ना, अशें शॅक धनी कामिलो कार्दोज हांणी सांगलें.
मजगतीं, दिवचल, सत्तरी म्हालांत काल सांजवेळा साडेपांचांक सुरू जाल्लो पावस रातभर पडटालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
