भांगरभूंय | प्रतिनिधी
देशांतलें पयलें प्रशिक्षण केंद्र दोनापावला, प्रधानमंत्री मोदी हांचे हस्तुकीं उक्तावण
पणजी ः प्रधानमंत्री नरेंद्र मोदी हांणी आयज गोंयच्या दोनापावलाच्या एनआयडब्ल्यूएस कॅम्पसांत ‘ओएनजीसी सी सर्व्हायव्हल इको-सिस्टम सेंटरा’ चें उक्तावण केलें. ह्या केंद्रांत तरणाट्यांक दर्याच्या वातावरणाक कशें जुळोवन घेवप, दर्याचें वातावरण इबाडल्यार स्वताची आनी हेरांची राखण कशी करची हाचेर प्रशिक्षण दितले. अशें तरेचे देशांतलें हें पयलें प्रशिक्षण केंद्र.
‘ओएनजीसी सी सर्व्हायव्हल इको-सिस्टम सेंटर’ ची रचना जागतीक मानकां प्रमाण केल्या. एका वर्सात हांगा 10 ते 15 हजार जवानांक प्रशिक्षण दितले. ह्या केंद्राचें उक्तावण आयज सकाळीं प्रधानमंत्री मोदी हांणी केलें. हे वेळार केंद्रीय मंत्री हरदीप सिंग पुरी, मुख्यमंत्री डॉ. प्रमोद सावंत आनी हेर मानेस्त हाजीर आशिल्ले.
पेट्रोलियम आनी बायोगॅस मळार देशाक आत्मनिर्भर करपाचो केंद्र सरकारान संकल्प केला. हें इंधन दर्यांतल्यान काडचें पडटा. फुडाराक अशा इंधन उत्पादन केंद्रांचेर काम करपाक व्हड प्रमाणांत मनीसबळाची गरज लागतली. दर्यावेल्या उद्देगांक चालना दिवपाखातीर पर्यावरणाक अनुकूल अशी मनीसबळ तयार करप गरजेचें आसा. इतलेंच न्हय तर थंय कसलेय संकश्ट आयल्यार स्वताची आनी हेरांची राखण कशी करची हाची कला तांकां आसप गरजेचें. सध्या भारतीय तरणाट्यांक अशें प्रशिक्षण घेवपाक परदेशांत वचचें पडटा. पूण, आतां भारतीय तरणाट्यांक गोंयांतल्या ह्या केंद्रांत सहजतायेन प्रशिक्षण मेळटलें. हातूंत दर्यांतले चक्रीवादळ, हवामानांत अचकीत बदल, तारवांचेर काम करतना उजो लागल्यार वा हेर अपघात जाल्यार कितें करचें हाचेर प्रशिक्षण दितले.
ह्या केंद्रांत नेमकें कितें आसा?
दोनापावला हांगाच्या प्रशिक्षण केंद्रांत व्हड तळें बांदलां. थंय कृत्रीम दर्याचें वातावरण तयार जालां. तातूंत कृत्रीम वादळ, उंच ल्हारां, व्हड पावस, तारवां बुडप अशें प्रसंग घडोवन हाडतात. तातूंत प्रशिक्षीतांक सोडतात. आनी उपरांत दर्यांत आणीबाणीच्या परिस्थितींत तांकां कशें वाटोवप तें शिकयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
